Քաղաքականություն
08.11.2021 | 18:32Վրաստանում կրկին քաղաքական լարված իրավիճակ է։ Ներկա և նախկին իշխանությունները վերադիրքավորվում են ՏԻՄ ընտրությունների արդյունքներով։ Դրանք տեղի ունեցան երկու փուլով։ Վրաստանի հարցերով փորձագետ Հասմիկ Մելիքսեթյանի խոսքով՝ հիմա ընդդիմությունը երկակի խաղ է խաղում։
«Հոկտեմբերի 30-ին եղավ ընտրությունների երկրորդ փուլ։ Ինչպես նախորդ բոլոր ընտրությունների ժամանակ, Վրաստանում ընդդիմությունը չի ընդունում ընտրության արդյունքները, բայց նաև չի հրաշարվում սեփական մանդատներից», – նշում է Մելիքսեթյանը։
Մասնագետը բացատրում է, որ այս ընտրությունները ցույց տվեցին, որ իշխանության դիրքերը դեռ ամուր են։ Ավելին, իշխող Վրացական երազանք կուսակցությունը կարողացավ նաև ժամանակ շահել՝ հետաձգելով իշխանության համար նոր պայքարը։
Ընդդիմության կենտրոնական ֆիգուրներից մեկը նախկին նախագահ Միխեիլ Սաակաշվիլին է, որ հիմա կալանավորված է։ Նա վերադարձել է Վրաստան, ուզում է գալ իշխանության։
Օրերս էլ Սաակաշվիլին իր համակիրներին կոչ է արել փողոցային շարժումով վերցնել իշխանությունը։ Նա բերել է հենց Հայաստանի օրինակը։
«Դա այն է, ինչ արեց հարևան Հայաստանը, որտեղ Փաշինյանը պարքարում էր նույնպիսի օլիգարխի դեմ, որին աջակցում էր Ռուսաստանը և որը կեղծել էր ընտրությունները։ Բայց հայ ժողովուրդը հաղթեց, շատ-շատերը դուրս եկան փողոց մինչև հանցագործ կառավարությունը կոտրվեց և արտահերթ ընտրությունների կոչով հանդես եկավ», – գրել էր Վրաստանի նախկին նախագահը։
Հիմա նա վերադարձել է Վրաստան՝ երկրի ղեկավարի աթոռը զբաղեցնելու համար, առայժմ, սակայն, զբաղեցնում է միայն իր բանտախուցը։
Ընդդիմությունն ուզում է ազատվել Ռուսաստանում բիզնեսներ ունեցող Բիձինա Իվանիշվիլիից, բայց ոչ միայն տանուլ է տալիս ընտրությունները, այլև երբեմն հարվածի տակ է ընկնում։
Վրաստանի հարցերով փորձագետը բացատրում է, որ ընդդիմությունը գերագնահատել էր իր կարողությունները։
«Եթե մտածում էին, որ մարդիկ համատարած դուրս են գալու փողոցներ, ինչ-որ հանրահավաքներ են լինելու, ցույցեր են լինելու ․․․ Դրանք իհարկե կան, և բազմահազարանոց ցույցեր կան, դա չենք ժխտում։ Բայց երևի այն թափը, ուժգնությունը, որ իրենք էին պատկերացնում, որպես այդպիսին, չկա», – նշում է մասնագետը։
Մելիքսեթյանը բացատրում է՝ Վրաստանն արդեն իմունիտետ ունի նման քաղաքական ակցիաների նկատմամբ, և առաջիկայում դժվար թե փոփոխություններ լինեն իշխանություն-ընդդիմություն հավասարակշռության մեջ։
Մանրամասները՝ տեսանյութում։
Գարիկ Հարությունյան
