16.09.2026 | 23:17
Գեղարքունիքի մարզի մի շարք հասցեներում 24 ժամ ջուր չի լինի
2022-ին ընդլայնվելու է անվճար և արտոնյալ պայմաններով դեղորայք ստացող շահառուների ցանկը
08.11.2021 | 16:31
Նոյեմբերի 8-ին ՀՀ ԱԺ առողջապահության ու ֆինանսավարկային եւ բյուջետային հարցերի մշտական հանձնաժողովների համատեղ նիստում քննարկվել են «ՀՀ 2022 թվականի պետական բյուջեի մասին» օրենքի նախագծով նախատեսված առողջապահության ոլորտի ֆինանսական հատկացումներն ու բյուջետային ծրագրերը․ տեղեկացնում են ՀՀ ԱԺ-ից։
ՀՀ առողջապահության նախարար Անահիտ Ավանեսյանը նախ անդրադարձել է համաճարակային իրավիճակին: Ըստ նրա՝ նախորդ օրը գրանցվել է քովիդով վարակման 810 դեպք, մահերի թիվը 35 է, այդ թվում՝ արձանագրվել է հղի կնոջ մահ: Անահիտ Ավանեսյանը փաստել է, որ համավարակի դեմ պայքարի կարեւորագույն միջոցը կա եւ մնում է պատվաստումը, որը բերում է իրավիճակի կայունացման: Ներկա դրությամբ առաջին դեղաչափը ստացել է 613 հազար, իսկ երկրորդը՝ 276 հազար քաղաքացի:
Անդրադառնալով 2022-ի պետբյուջեի ֆինանսական հատկացումներին՝ նախարարը փաստել է, որ եկող տարի իրականացվելու է 13 ծրագիր՝ 50 միջոցառում:
Անահիտ Ավանեսյանի խոսքով՝ բնակչությանը մատչելի եւ որակյալ առաջնային բժշկական օգնության եւ սպասարկման տրամադրման նպատակով իրականացվելու է «Առողջության առաջնային պահպանում» ծրագրը, որին հատկացվելու է 27,804.5 մլն դրամ:
«Դեղապահովում» ծրագրով նախատեսվել է 3 մլրդ 880 մլն դրամ: Ծախսերն ընթացիկ տարվա համեմատ ավելացել են 10%-ով: Ապահովվելու է 12 հիվանդության ծածկույթ, 267 հազար 175 շահառուների պետությունն անվճար եւ արտոնյալ պայմաններով կտրամադրի համապատասխան դեղորայք:
Նախարարությունն իրականացնելու է նաեւ այլ ծրագրեր, որոնց նպատակը մարդու կյանքին եւ առողջությանը վտանգ սպառնացող վիճակներում որակյալ շտապ բժշկական օգնության ծառայությունների տրամադրումն է, ինչպես նաեւ սոցիալապես անապահով եւ հատուկ խմբերում ընդգրկված անձանց բժշկական օգնության հասանելիության ու մատչելիության մակարդակի բարձրացումը:
Նշվել է նաեւ, որ Առողջապահության նախարարության հիմնական խնդիրներից է հանրապետությունում ուռուցքաբանական ծառայությունների շարունակական բարելավումը: 2022-ին նախատեսվում է վերանայել ուռուցքաբանական վիրահատությունների գները:
Իրականացվելու են կապիտալ ծախսեր` մարզային առողջապահական կազմակերպությունների շենքային եւ նյութատեխնիկական պայմանների բարելավման նպատակով:
