ԵՐԵՎԱՆԻ ԺԱՄԱՆԱԿՈՎ․ Քովիդը ցույց տվեց, որ այս կրթություն կոչվածն իր բովանդակությամբ անհատին չի ծառայում. Աշոտ Բլեյան

«Քովիդը բացահայտում է մեր կրթական արատները, ռենտգեն է անում, ասում է տեսեք` ինչքան թերություններ ունեք, տեսեք, որ արդիական չեք, ստեղծական, մոբիլ չեք, անընդհատ «մահանաների» վրա հիմնված կրթություն ունենք, հիմա էլ քովիդն ենք դարձրել «մահանա»` փոխանակ արագ շտկվեք, զինվենք, վերցնենք նոր գործիքներ, հիգիենան դարձնենք կրթության առանցք»,- Factor.am-ի հետ զրույցում նման տեսակետ հայտնում Մխիթար Սեբաստացի կրթահամալիրի հիմնադիր-տնօրեն Աշոտ Բլեյանը:

Նրա խոսքով`ավելի հեշտ է արագ ուղղել սխալներն ու կրթությունը դարձնել ազդեցիկ գործիք, քան ուսումնասիրությունների մասին խոսել. «Քովիդը ցույց տվեց, որ այս կրթություն կոչվածն իր բովանդակությամբ անհատին չի ծառայում և դրա կազմակերպումն արդիական ու ժամանակակից չէ»:

Աշոտ Բլեյանը հարցնում է` ինչու պետությունը չկարողացավ հեռավար կրթության կազմակերպման շրջանակում յուրաքանչյուր ուսուցչի ապահովել նոթբուքով, ինտերնետով, որպեսզի հեռավար կրթույունը ծառայեր իր նպատակին, դառնար գործոն, կամ ինչու ուսուցիչն ինքը նպատակադրված չէ ցանկացած գնով շարունակելու դասերը:

Կրթահամալիրի տնօրենը, խոսելով ԿԳՄՍ նախարարության հետ համագործակցության մասին, նշում է, որ վերջինիս հետ տասնյակ նախագծեր են իրականացնում. «Ընդհանրապես այս «թսթս», դանդաղ, ալարկոտ տեմպը, ժամանակավրեպ լինելը մեր հասարակության հիվանդությունն է. դա, ցավոք, պետական ապարատին էլ է բնորոշ, ցավոք սրտի, այլ կերպ լինել չի կարող»:

Մանրամասները` տեսանյութում:

Աննա Բաբաջանյան