11.10.2026 | 14:46
Այսօր աղջիկ երեխաների միջազգային օրն է
Netflix-ի սերիալները՝ քաղաքական բանավեճի միջոց Թուրքիայում․ ընդդիմությունն Էրդողանի կառավարությանը քննադատել է հայտնի սերիալներով
Քաղաքականություն
05.11.2021 | 23:31
Թուրքայի գլխավոր ընդդիմադիր Ժողովրդահանրապետական կուսակցության առաջնորդ Քեմալ Քըլըչդարօղլուն յուրօրինակ կերպով է քննադատել կառավարությանն ու նախագահ Ռեջեփ Թայիփ Էրդողանին, գրում է Duvar-ը։
Ակնարկելով, որ Էրդողանն ու իշխող «Արդարություն և զարգացում» կուսակցությունը ժողովրդից միլիոնավոր դոլարներ են թալանել, ընդդիմադիր գործիչը դա անելու համար Netflix-ի «La Casa De Papel» սերիալի օգնությանն է դիմել։ Նա իր թվիթերյան էջում կիսվել է սերիալի հինգերորդ սեզոնի թրեյլերով։
Արձագանքելով Թուրքիայի մասով այն դիտարկմանը, որ «Կողոպուտն ավարտվում է, և դարաշրջանը մոտենում է ավարտին», Քըլըչդարօղլուն գրել է․ «Այո՛, այդպես է, բայց նա, ցավոք, փախչում է ընտրություններից»:
Քըլըչդարօղլուի գրառմանը պատասխանել է Թուրքիայի ներքին գործերի նախարար Սուլեյման Սոյլուն՝ նշելով, որ CHP-ն կպարտվի ընտրություններում, ինչի պատճառով էլ CHP-ի առաջնորդը ժամանակ կունենա «տանը շատ սերիալներ դիտելու»։
«Մի՛ անհանգստացիր, ինչպես նախկինում 10 անգամ եղել է, 2023-ին էլ կլինի, դասդ կստանաս և տանը շատ սերիալներ կնայես»,- գրել է Սոյլուն։
Քննարկմանն այնուհետ միացել են Ժողովրդահանրապետական կուսակցության անդամներ Էնգին Օզքոչն ու Օզգյուր Օզելը, այս անգամ Netflix-ի մեկ այլ սերիալ՝ Narcos-ը նշելով։
«Մի՛ խառնվիր այն սերիալին, որը չգիտես։ Քո սերիալը #NarcosSoylu-ն է»,- գրել է Օզքոչը։ Այդպիսով նա ակնարկել է Սոլյուի կապը մաֆիայի ու քրեական կազմակերպությունների հետ։
Օզելն էլ արձագանքել է Սոյլուին և հիշեցրել ԱԶԿ-ի պարտությունը 2019 թվականի Ստամբուլի քաղաքապետի ընտրություններում։
Նշենք, որ Թուրքիայի ընդդիմությունը պահանջում է արտահերթ ընտրությունների անցկացում, քանի որ, ըստ նրանց, ԱԶԿ-ն այլևս չի կարող երկիրը ղեկավարել։ Էրդողանն իր հերթին հայտարարում է, որ ընտրություններն անցկացվելու են նախատեսված ժամկետում՝ 2023 թվականին։
Էմմա Չոբանյան
