27.06.2026 | 01:34
5.5 մլրդ դոլար. աշխարհի ամենաթանկ ստադիոնում ԱՄՆ-Թուրքիա հանդիպման ետնաբեմը Factor TV-ի թղթակցի աչքերով
Տասնյակ մահեր և հիվանդացության ահագնացող թվեր․ ինչպե՞ս կասեցնել COVID-19-ի մասին ապատեղեկատվությունը․ «ՈՒՇԱԴՐՈԻԹՅԱՆ ԿԵՆՏՐՈՆՈՒՄ»․ ՏԵՍԱՆՅՈՒԹ
Հաղորդաշարեր
04.11.2021 | 20:47
Factor TV-ի «Ուշադրության կենտրոնում» հաղորդաշարի այս թողարկման թեման Հայաստանում կորոնավիրուսային իրավիճակը, համավարակի դեմ պատվաստանյութերի մասին շրջանառվող ապատեղեկատվության դեմ պայքարն է։
Հաղորդման հյուրերից ԵՊԲՀ ավագ դասախոս, հանրային առողջապահության մասնագետ Դավիթ Մելիք-Նուբարյանի խոսքով՝ իսկապես Հայաստանում կոնորավիրուսային իրավիճակը բավականին լարված է։ Դրա պատճառը, ըստ նրա, նախևառաջ այն է, որ մենք չենք տեսնում հայկական հասարակության լայն շրջանակների մոտ կորոնավիրուսի համաճարակի դեմ պայքարի պահանջարկ։
«Դուք լսե՞լ եք, որ որևէ մտավորական, արվեստի գործիչ, մշակույթի գործիչ, գիտնական, համայնքի ղեկավար, պետական կառավարման համակարգում այլ պաշտոնյա՝ բացի վարչապետից և առողջապահության նախարարից, խոսի, որ այլևս այսպես ապրել հնարավոր չէ, ասի, որ Հայաստանում ապրող հայ ժողովուրդը կրում է սարսուռ առաջացնող կորուստներ ամեն օր։ Երբ այդ պահանջարկը ձևավորվի, արդեն մենք որոշումներ կայացնողներից կկարողանանք պահանջել արդյունավետ պետություն»,- ասաց նա։
Հայկական բժշկական ասոցիացիայի նախագահ Արմեն Սողոյանի խոսքով էլ՝ մեզանում մարդիկ, հատկապես՝ պատերազմից հետո, ավելի հակված են բացասական տեղեկատվությանը հավատալու։
«Երբևէ մենք չենք ապրել պետության գիտակցությամբ։ Միշտ եղել ենք փոքրամասնություն կամ պետություն չենք ունեցել, և չենք ունեցել այն գիտակցությունը, որ կա պետություն, որը մեր մասին պետք է մտածի, որ մենք պետք է կարողանանք իրական պահանջատեր լինել։ Դա բազա է, որի արդյունքում ստեղծվում է մի իրավիճակ, որը պարարտ հող է դառնում սին տեղեկությունների հավատալու համար»,- ասաց նա։
Քննարկման մասնակիցներից «Ֆրիդըմ Հաուսի» ապատեղեկատվության դեմ ուղղված հայաստանյան ծրագրի մասնագետ Անդրանիկ Շիրինյանն էլ, անդրադառնալով կորոնավիրուսի, դրա դեմ եղած պատվաստանյութերի վերաբերյալ շրջանառվող ապատեղեկատվությանը, կեղծ պատմություններին՝ նշեց, որ դրանք լայնորեն շրջանառվում էին, քանի որ համավարակը և դրա հետ կապված ամենը նոր երևույթներ էին, մարդիկ դրանց անծանոթ էին։ Նպատակները, ըստ նրա, կարող են տարբեր լինել՝ տնտեսական, քաղաքական, բիզնես շահեր և այլն։
«Այստեղ մեծ անելիք ունի տեղական անկախ մեդիան, որ հավելյալ հարթակ չտրամադրի անձանց, որոնք տարածում են ապատեղեկատվություն, այլ խոսքը տա այն մարդկանց, որոնք իրականում մտահոգվում են հանրային առողջության մասին»,- ասաց նա։
Մանրամասները՝ տեսանյութում։
Հռիփսիմե Հովհաննիսյան
