11.10.2026 | 13:06
Վթարային ջրանջատում Վանաձոր քաղաքում
Ադրբեջանը հետաքրքրված է Պակիստանից JF-17 Thunder կործանիչների գնմամբ. հարցը երկու երկրների օրակարգի առանցքային կետն է
Քաղաքականություն
02.11.2021 | 19:46
Ադրբեջանը հետաքրքված է պակիստանյան JF-17 Thunder կործանիչների գնմամբ։ Այս մասին հայտարարել է Իսլամաբադում Ադրբեջանի դեսպանատան ռազմական կցորդ Մեհման Նովրուզովը, գրում է ադրբեջանական Report-ը՝ վկայակոչելով The Week-ը։
«Պակիստանից JF-17 Thunder ինքնաթիռների գնումը մեր օրակարգի առանցքային կետն է»,- հավելել է Նովրուզովը։
Նա նշել է, որ Ադրբեջանն աշխատում է Պակիստանի հետ իր ռազմաօդային ուժերի արդիականացման ուղղությամբ և մտադիր է գնել JF-17 կործանիչի Block3 մոդիֆիկացիան, որում արդիականացված են խցիկի էլեկտրական և ռադարային համակարգերը։
Նշենք, որ ադրբեջանական մամուլում պարբերաբար են տեղեկություններ տարածվում պակիստանյան JF-17 Thunder կործանիչների գնման վերաբերյալ։
Ի դեպ՝ Պակիստանն Արցախյան 44-օրյա պատերազմի ժամանակ նույնպես աջակցում էր Ադրբեջանին։ Երկու երկրներն ակտիվորեն համագործակցում են ռազմական ոլորտում, նաև համատեղ զորավարժություններ են անցկացնում։
Հավելենք, որ օրերս էլ Ադրբեջանի պաշտպանության նախարարի տեղակալ, ռազմաօդային ուժերի (ՌՕՈՒ) հրամանատար, գեներալ-լեյտենանտ Ռամիզ Թահիրովը հայտարարել էր, որ առաջիկայում նոր ռազմական ինքնաթիռներ են գնելու, որոնց մասին հանրությունը շուտով կիմանա։
Էմմա Չոբանյան
