Էրդողանը Մակրոնին ներկայացրել է Հարավային Կովկասում «վեցի հարթակի» գաղափարը

Թուրքիայի նախագահ Ռեջեփ Թայիփ Էրդողանը հայտարարել է, որ իր ֆրանսիացի գործընկեր Էմանուել Մակրոնի հետ քննարկել է Հարավային Կովկասում «վեցի հարթակի» գաղափարը, փոխանցում է ՌԻԱ Նովոստին։

«Դրանից հետո նա (Մակրոնը) բարձրացրեց Հարավային Կովկասում իրավիճակի հարցը։ Մենք ասացինք, որ այնտեղ ենք եղել (Ադրբեջանում) անցյալ շաբաթ, և որ այս պահին Հարավային Կովկասում դրական քայլեր են ձեռնարկվում, և մեր եղբայր Իլհամ Ալիևը վճռականորեն ցանկանում է շարունակել այդ դրական քայլերը։ Այդ հանդիպման (Մակրոնի հետ) ժամանակ առաջին պլան է մղվել տարածաշրջանում «վեցի հարթակի» ստեղծումը։ Ռուսաստանը, Ադրբեջանը, Թուրքիան, Իրանը, Վրաստանը և Հայաստանը, եթե բոլորը համաձայնվեն, մենք այստեղ խաղաղության հարթակ կստեղծենք»,- լրագրողներին ասել է Էրդողանը։

Ավելի վաղ ՌԴ ԱԳ նախարար Սերգեյ Լավրովը Իրանի արտգործնախարար Հոսեյն Ամիր Աբդոլլահիանի հետ համատեղ մամուլի ասուլիսի ժամանակ հայտարարել էր, որ կողմերը քննարկել են «3+3» ձևաչափի ստեղծման հնարավորությունը։ Լավրովը նշել էր, որ Իրանը դրական է վերաբերվում այս նախաձեռնությանը, ինչպես Թուրքիան և Ադրբեջանը, և հույս հայտնել, որ Վրաստանը շահագրգռվածություն կցուցաբերի Անդրկովկասի զարգացման վերաբերյալ խորհրդակցությունների և որոշումների համաձայնեցման նման մեխանիզմ ստեղծելու հարցում։ Հոկտեմբերին, սակայն, Վրաստանի ԱԳՆ-ն հերքեց այն տեղեկությունը, թե գերատեսչության ղեկավար Դավիթ Զալկալիանին, իբր, հաստատել է վրացական կողմի պատրաստակամությունը՝ մասնակցելու «3+3» ձևաչափով բանակցություններին՝ Հայաստանի, Ադրբեջանի, Վրաստանի, Իրանի, Ռուսաստանի և Թուրքիայի մասնակցությամբ։

Տաթև Ֆռանգյան