16.12.2025 | 23:30
Հաագայում 35 երկիր ստորագրել է Ուկրաինային փոխհատուցման համար միջազգային հանձնաժողովի ստեղծման կոնվենցիան
Շիրակի մարզում պատվաստվել է 38 հազար քաղաքացի․ կիրակի օրը Գյումրիում հայտարարված է պատվաստման օր
29.10.2021 | 22:24
Շիրակի մարզպետարանի առողջապահության և սոցիալական ապահովության վարչության պետի ժ/պ Լեյլի Ասլանյանը Factor.am-ին տեղեկացրեց, որ այս պահի դրությամբ Շիրակի մարզի 18-ից բարձր տարիքային խմբի բնակիչների մոտ 22 տոկոսը պատվաստվել են, այսինքն՝ 38 հազար քաղաքացի։
«Իհարկե, եթե ընդհանուր առմամբ վերցնենք, ցածր ցուցանիշ է, բայց մյուս մարզերի հետ համամետած, մենք լավագույններից ենք, առաջին հնգյակի մեջ ենք։ Իհարկե, շարունակում ենք աշխատել այն ուղղությամբ, որ հնարավորինս բարելավենք պատվաստումային ընդգրկվածության ցուցանիշը։
Մենք նաև առաձին տվյալներ ենք վերցնում՝ ըստ ոլորտների, կոնկրետ բուժաշխատողների մասով կարող եմ ասել, որ 85,8 տոկոսն արդեն պատվաստված է։
Կրթական հաստատությունների անձնակազմի 89, 4 տոկոսն է արդեն պատվաստված, բացի այդ պետական կառավարման, ինչպես նաև տեղական ինքնակառավարման մարմիններից պատվաստումային ընդգրկվածության ցուցանիշները ևս ամփոփում ենք․ պատվաստված է 67, 2 տոկոսը, տրանսպորտային ոլորտի աշխատակիցների՝ 48,5 տոկոսը։
Մենք այս տվյալները պարբերաբար թարմացնում ենք շաբաթվա կտրվածքով, մոնիտորինգ ենք անում և տվյալները ներկայացնում ենք առողջապահության նախարարություն»,-ասաց Լեյլի Ասլանյանը։
Մարզպետարանի պաշտոնյան տեղեկացրեց, որ Շիրակի մարզում առկա են չորս տեսակի պատվաստանյութեր՝ «Մոդեռնա», «Աստրա Զենեկա», «Սինոֆարմ» և «Սպունիկ Վ»։
«Առողջապահության ազգային ինստիտուտը կիրակի օրը հայտարարել է պատվաստման օր։ Առողջապահության ազգային ինստիտուտից եկած խումբը քաղաքացիներին կպատվաստի Վարդանանց հրապարակում գտնվող «Հոկտեմբեր» կինոթատրոնի սրահում, քաղաքի բանուկ հատվածում, որտեղ շատ զբոսաշրջիկներ կան, Հայաստանի տարբեր բնակավայրերից են հյուրընկալվում, նաև մեր քաղաքացիներն են ակտիվ շրջում կիրակի օրերին։ Առողջապահության ազգային ինստիտուտի կազմակերպած միջոցառմանը կփորձենք ևս ցուցանիշներ ավելացնել»,-ասաց Լեյլի Ասլանյանը։
Արմիկ Մովսիսյան
