Քաղաքականություն
28.10.2021 | 23:30
Թուրքիայի կառավարությունը ներգրավված է փողերի լվացման մեջ։ Նման հայտարարություն է արել Թուրքիայի ընդդիմադիր «Լավ»՝ IYI կուսակցության ղեկավար Մերալ Աքշեները կուսակցության խորհրդարանական խմբակցության հետ հանդիպմանը, գրում է Duvar-ը։
«Գումարներ լվացվո՞ւմ են Թուրքիայում։ Իհարկե, ցավոք, դա այդպես է։ Եվ դա արվում է անմիջապես կառավարության կողմից»,- ասել է Աքշեները։
Նրա այս հայտարարությունը հնչում է այն բանից հետո, երբ օրերս FATF-ը Թուրքիան ներառեց «գորշ ցուցակում»՝ փողերի լվացման և ահաբեկչության ֆինանսավորման դեմ պայքարը ձախողելու համար։
Աքշեները նաև հայտարարել է, որ իշխող «Արդարություն և զարգացում» կուսակցությունը Թուրքիան դուրս է թողել աշխարհի 20 ամենամեծ տնտեսությունն ունեցող երկրների շարքից՝ չնայած խոստանում էր մինչև 2023թ․ ներառել «թոփ 10»-ում։
«Դուք հայտնվում եք «գորշ ցուցակում», եթե ձեր երկրում մեծ քանակությամբ փողերի լվացում է տեղի ունենում, եթե ձեր երկրի կողմից ֆինանսավորվում են ահաբեկչական խմբերը և դուք ձախողում եք դրանց դեմ պայքարը»,- ասել է ընդդիմադիր գործիչը՝ նշելով, որ թուրքական կառավարությունն արդարացնում է փողեր լվացողներին։
Նա նաև ասել է, որ նախագահական համակարգը սպառնալիք է երկրի անվտանգության համար, և որ նախագահի համար ազգային անվտանգության մասին պատկերացումներն իր պաշտոնով են սահմանափակվում։
«Եթե ինչ-որ բան կամ ինչ-որ մեկը սպառնում է նրա աթոռին, ազգային անվտանգության սպառնալիք է։ Դուք չեք կարողանում ապրուստի համար վաստակել՝ դուք ահաբեկիչ եք։ Եթե դուք սնանկության եզրին եք, ուրեմն դավաճան եք։ Նայեք այս համակարգին, որն ահավոր վիճակի մեջ է դրել մեր երկիրը»,- ասել է Աքշեները։
Էմմա Չոբանյան
