29.06.2026 | 14:16
«Դադարեցրե՛ք դա»․ Օրբելյանի և Սեդա Սաֆարյանի վեճից հետո փաստաբանին նկատողություն հայտարարվեց․ ՏԵՍԱՆՅՈՒԹ
Ադրբեջանցի գեներալին Բաքվի դատարանը դատապարտել է 10 տարվա ազատազրկման
Քաղաքականություն
27.10.2021 | 23:32
Այսօր ավարտվել է ադրբեջանցի գեներալ, կորպուսի նախկին հրամանատար Ռովշան Աքպերովի գործով դատավարությունը։ Ադրբեջանական լրատվամիջոցների հաղորդմամբ՝ Բաքվի ռազմական դատարանը հնչեցրել է գեներալ-լեյտենանտ Ռովշան Աքպերովի դատավճիռը։
Դատարանը նրան մեղավոր է ճանաչել Քրեական օրենսգրքի 12․1, 120․2․2 հոդվածներով՝ դիտավորյալ սպանություն այլ երկրի տարածքում, միաժամանակ՝ հանել 12․1, 221․3 հոդվածներն ու դատապարտել 10 տարի ժամկետով ազատազրկման։
Դատախազն առաջարկել է Աքպերովին 11 տարվա ազատազրկման դատապարտել։ Ինքը՝ Աքպերովը, չի ընդունել առաջադրված մեղադրանքն ու խնդրել արդարացնել իրեն։
Դատարանը նաև որոշում է կայացրել Աքպերովից 40 հազար մանաթ գանձել՝ հօգուտ տուժողի իրավահաջորդ Ֆադայ Ալիևի։ Միաժամանակ, սակայն, դատարանը Աքպերովին չի զրկել զինվորական, ինչպես նաև Ադրբեջանի ազգային հերոսի կոչումից, որը նրան շնորհվել է 1994 թվականին։
Մեղադրանքի համաձայն՝ 2001թ․ մայիսի 31-ին Ռովշան Աքպերովի ու ձեռնարկատեր Էլչին Ալիևի միջև Կիևում «Սիկորա» ռեստորանի դիմաց ծագած վեճի արդյունքում Ալիևը սպանվել է դանակի հարվածից։
Նշենք, որ այս տարիներին Ադրբեջանի իշխանություններն անտեսում էին այս հանցագործությունը՝ չնայած սպանվածի հարազատների բազմաթիվ բողոքներին ու դիմումներին։
Աքպերովը ձերբակալվեց այս տարվա մարտին և մինչ օրս անհայտ է, թե ինչո՞ւ ադրբեջանական իշխանությունները որոշեցին նրա հետ հաշվեհարդար տեսնել։
Հավելենք, որ Ռովշան Աքպերովն Ադրբեջանի ԶՈՒ 4-րդ բանակային կորպուսի հրամանատարն էր, որին պաշտպանության նախարար Զաքիր Հասանովը փետրվարի սկզբին ազատել էր պաշտոնից։ Նրա պաշտոնանկության մասին լուրերը տարածվում էին դեռևս Արցախյան երկրորդ պատերազմի ընթացքում։
Էմմա Չոբանյան
