Քաղաքականություն
27.10.2021 | 23:09
Իսպանական Հոմերա կղզու (Կանարյան կղզիների ինքնավար համայնք) ղեկավար Կազիմիրո Կուրբելոն առաջարկել է Պալմա կղզում ռազմական օդանավից ռումբ նետել՝ ժայթքող հրաբխի լավայի հոսքերին ճիշտ ուղղություն տալու համար։ Այս մասին գրում է El Mundo թերթը։
«Մ՞իթե՞ չկա ինքնաթիռ, որը թռչում է։ Թռչի ու ստիպի ռումբին ընկնել և՝ բո՜ւմ։ Միգուցե այն, ինչ ասում եմ, հիմարություն է, կարծում եմ, որ տեխնոլոգիական տեսանկյունից այս [տարբերակը] պետք է փորձարկվի»,- ասել է Կուրբելոն:
Նշենք, որ սեպտեմբերի 19-ին Էլ Պասո բնակավայրի տարածքում գտնվող կղզում հրաբխի ժայթքում է սկսվել։ Հրաբխային նյութերի ակտիվ արտանետում է տեղի ունենում խառնարանից: Լավայի հոսքերն ավերել են ավելի քան 2 հազար շենք և հասել օվկիանոս, ինչը հանգեցրել է վտանգավոր գազերի արտանետմանը։ Անվտանգության նկատառումներից ելնելով՝ կղզում արդեն տարհանվել է մոտ 7 հազար մարդ, զոհեր չկան։
Վերջերս Պալմայում կրկին աճել է սեյսմոլոգիական ակտիվությունը։ Մասնավորապես, հարյուրավոր երկրաշարժեր են գրանցվել, սակայն դրանց ուժգնությունը չի գերազանցել 4,9 մագնիտուդը։
Տաթև Ֆռանգյան
