Չավուշօղլուն Էրդողանին սպառնացել է հրաժարական տալ՝ արևմտյան երկրների դեսպաններին արտաքսելու դեպքում

Թուրքիայի ԱԳ նախարար Մևլութ Չավուշօղլուն սպառնացել է հրաժարական ներկայացնել, երբ նախագահ Ռեջեփ Թայիփ Էրդողանն արևմտյան 10 երկրների դեսպաններին խոստացել է «պերսոնա նոն գրատա» («անցանկալի անձ») հայտարարել, որոնք պահանջում էին ազատ արձակել Օսման Քավալային։ Այս մասին գրում է «Ահվալ» գործակալությունը՝ վկայակոչելով DW-ի թուրքական ծառայությունը։

Հրապարակման համաձայն՝ Չավուշօղլուն, որն Էրդողանի հայտարարության ժամանակ գտնվել է Հարավային Կորեայում, նախագահին հորդորել է հետաձգել որոշումը՝ մինչև երկուշաբթի նախատեսված կառավարության  նիստը, երբ ժամանակ կունենան «դեմ առ դեմ խոսելու»։

«Եթե դեսպանները հայտարարվեն «պերսոնա նոն գրատա», ես ստիպված եմ լինելու լքել նախարարությունը»,- Էրդողանին ասել է Չավուշօղլուն։

Նախագահը պատասխանել է, որ ոչինչ չի կարող անել, գրում է լրատվականը՝ չնշելով, թե ինչպես է ստացել այդ տեղեկությունը։

Հաղորդվում է նաև, որ իշխող «Արդարություն և զարգացում» կուսակցության անդամները Էրդողանին հետ են կանգնեցրել այդ որոշումից ՝զգուշացնելով, որ դա կազդի դիվանագիտական հարաբերությունների վրա այնպիսի երկրների դեպքում, ինչպիսիք են ԱՄՆ-ն, Գերմանիան, Ֆրանսիան և Կանադան։ Նշվում է, որ նրանք փնտրել են փոխզիջումային տարբերակ, որից հետո նախագահի աշխատակազմն ու ԱԳՆ-ն  դեսպանություններին փորձել են համոզել, որ չմիջամտեն երկրի ներքին գործերին։

Հիշեցնենք՝ նախօրեին Թուրքիայի նախագահ Ռեջեփ Թայիփ Էրդողանը հայտնել էր, որ արևմտյան 10 երկրների դեսպաններին «պերսոնա նոն գրատա» («անցանկալի անձ») հայտարարելու հետ կապված ճգնաժամը լուծված է այն բանից հետո, երբ դեսպանատները նոր հայտարարություն են տարածել։

Թուրքիայում ԱՄՆ-ի, Կանադայի ու արևմտյան այլ երկրների դեսպանատները նոր հայտարարությամբ հայտնում են, որ մտադիր են հարգել ընդունող պետության օրենքներն ու կանոնակարգերը և չխառնվել այդ երկրին ներքին գործերին։ Մինչ այդ, Էրդողանը ԱԳՆ-ին հանձնարարել էր երկրից վտարել ու «անցանկալի անձ» ճանաչել ԱՄՆ-ի և արևմտյան այլ երկրների դեսպաններին այն բանից հետո, երբ նրանք միասնական հայտարարություն էին տարածել ակտիվիստ Օսման Քավալային ազատ արձակելու կոչով։

Խոսքն ԱՄՆ-ի, Գերմանիայի, Դանիայի, Ֆինլանդիայի, Ֆրանսիայի, Նիդերլանդների, Շվեդիայի, Կանադայի, Նորվեգիայի, Նոր Զելանդիայի դեսպանատների մասին է։

Էմմա Չոբանյան