25.04.2026 | 15:08
Ըմբշամարտի ԵԱ․ Արսեն Հարությունյանը երկու տպավորիչ հաղթանակով դուրս եկավ կիսաեզրափակիչ
Ջո Բայդենը Հռոմում G20-ի շրջանակում քննարկելու է նաև Իրանի միջուկային ծրագրի հարցը
Քաղաքականություն
26.10.2021 | 22:41
ԱՄՆ նախագահ Ջո Բայդենը մտադիր է Հռոմում G20-ի (Մեծ քսանյակի) գագաթնաժողովի շրջանակում քննարկել նաև Իրանի միջուկային ծրագիրը։ Այս մասին հայտարարել է ԱՄՆ նախագահի ազգային անվտանգության հարցերով օգնական Ջեք Սալիվանը Սպիտակ տանը կայացած ճեպազրույցի ընթացքում, գրում է ՏԱՍՍ-ը։
ԱՄՆ նախագահը Եվրոպա է մեկնելու հինգշաբթի։
«Նախ նա կմեկնի Հռոմ՝ G20-ի համար, իսկ հետո Գլազգո՝ COP-26 կլիմայական գագաթնաժողովին։ G20-ի գագաթնաժողովի շրջանակում նա հնարավորություն կունենա առաջնորդների հետ քննարկել մի շարք առանցքային հարցեր, այդ թվում՝ մատակարարման շղթաների ճկունությունը, էներգակիրների գները, Իրանի միջուկային ծրագիրն ու շատ այլ հարցեր»,- ասել է Սալիվանը։
Ուրբաթ Բայդենը նախատեսում է հանդիպել Հռոմի պապ Ֆրանցիսկոսի, ինչպես նաև Ֆրանսիայի նախագահ Էմանուել Մակրոնի հետ։
Սալիվանը նշել է, որ Վաշինգտոնը վերջնաժամկետ չի դնում՝ մինչև երբ հնարավոր կլինի վերադարձ Իրանի միջուկային ծրագրի վերաբերյալ Գործողությունների համատեղ համապարփակ ծրագրի շրջանակում ստանձնած պարտավորություններին։
«Ես հստակ ժամկետ չունեմ այդ հարցի շուրջ։ Ակնհայտ է, որ մենք ուշադրությամբ հետևում ենք Իրանի միջուկային ծրագրի իրագործման հարցում առաջընթացին։ Մենք անհանգստացած ենք քայլերով, որոնք նրանք անում են։ Մեր առաջին ու գլխավոր առաջնահերթությունն է՝ վերադառնալ բանակցությունների սեղան ու գործարքին, որը սահմանափակում է իրանական միջուկային ծրագիրը»,- ասել է Սալիվանը։
Էմմա Չոբանյան
