15.12.2025 | 19:13
Լուվրը ժամանակավորապես փակ է․ աշխատակիցները գործադուլ են սկսել
Ադրբեջանն Իտալիայից ռազմաուսումնական M-346 ինքնաթիռներ է գնել. փորձագետ
Քաղաքականություն
26.10.2021 | 21:58
Մեծ հավանականությամբ կարելի է պնդել, որ Ադրբեջանը շուտով Իտալիայից ռազմաուսումնական M-346 ինքնաթիռներ է ստանալու։ Այս մասին «Սպուտնիկ»-ի ադրբեջանական ծառայության հետ զրույցում հայտնել է ռազմական փորձագետ Ադալյաթ Վերդիևը՝ պատասխանելով հարցին, թե ինչ ռազմական ինքնաթիռներ է Ադրբեջանը ձեռք բերում։
Նշենք, որ օրերս Ադրբեջանի պաշտպանության նախարարի տեղակալ, ռազմաօդային ուժերի (ՌՕՈՒ) հրամանատար, գեներալ-լեյտենանտ Ռամիզ Թահիրովը հայտարարել էր, որ առաջիկայում նոր ռազմական ինքնաթիռներ են գնելու, որոնց մասին հանրությունը շուտով կիմանա։
Ադրբեջանի կողմից նոր ինքնաթիռների ձեռքբերման մասին տեղեկություններ տարածվում են պարբերաբար։ Հիմնականում խոսվում էր պակիստանա-չինական համատեղ արտադրության JF-17 Thunder ինքնաթիռների մասին, սակայն Թահիրովի վերջին հայտարարությունը վկայում է, որ օդանավերի գնման հարցը, ամենայն հավանականությամբ, արդեն լուծված է։
Ռազմական փորձագետ Ադալյաթ Վերդիևն ասել է, որ բանակցություններն ընթացել են վերջին մի քանի տարիներին։
«Դեռևս 2018 թվականին ադրբեջանական 3-րդ միջազգային պաշտպանական «ADEX-2018» ցուցահանդեսին «Leonardo» ընկերության վաճառքի գծով ներկայացուցիչ Ֆրանչեսկո Մոլինարին ինձ ասաց, որ Ադրբեջանի ԶՈՒ-ի հետ բանակցություններ են ընթանում M-346 ինքնաթիռների գնման շուրջ»,- ասել է Վերդիևը։
Այնուհետ տեղի է ունեցել ընկերության ներկայացուցիչների հանդիպումը Ադրբեջանի նախագահի հետ։ Փորձագետի խոսքով՝ ավելի վաղ ադրբեջանցի օդաչուները երկու անգամ Իտալիայի ավիաբազայում փորձարկել են նշված ինքնաթիռները։ Այս ռազմաուսումնական ինքնաթիռները թռիչքատեխնիական բնութագրով գերազանցում են իրենց անալոգներին։ Ամենամեծ առավելությունն այն է, որ դրանք տնտեսող են և մեծ արագություն ունեն։ Ըստ փորձագետի՝ դրանք հաճախ անվանում են «երկնային «Ֆերրարի»»։
«Ոչ մեկի համար գաղտնիք չէ՝ որքան լուրջ պահանջներ է ներկայացնում իսրայելական բանակը՝ ձեռք բերելով այս կամ այն զինտեխնիկան։ Եթե մշտապես պատերազմող Իսրայելն ընտրել է «Leonardo» ընկերության ինքնաթիռ, նշանակում է՝ չի գտել մեկ ուրիշը, որը կարող է գերազանցել դրան»,- ասել է նա։
Վերդիևը նաև նշել է, որ պակիստանյան կողմի հետ JF-17 ինքնաթիռների ձեռքբերման պայմանագիր չի կնքվել, իսկ ահա Իտալիայի հետ կնքվել է և շարունակվել դրանց՝ Ադրբեջան մատակարարումների համար արտադրական գործընթացը։
Էմմա Չոբանյան
