Քաղաքականություն
26.10.2021 | 23:33
Ասիայում 2020 թվականը դարձել է ամենաշոգ տարին, որտեղ բարձր ջերմաստիճանը նպաստել է բնական աղետներին և լուրջ տնտեսական կորուստների հանգեցրել, որոնք էլ լրջորեն ազդել են տարածաշրջանի զարգացման վրա, գրում է The Guardian-ը՝ վկայակոչելով ՄԱԿ-ի Համաշխարհային օդերևութաբանական կազմակերպության (WMO) զեկույցը:
Փաստաթուղթը հրապարակվել է ՄԱԿ-ի Կլիմայի փոփոխության կոնֆերանսին ընդառաջ, որը պետք է մեկնարկի հոկտեմբերի 31-ին բրիտանական Գլազգոյում:
Զեկույցի համաձայն՝ միջին ջերմաստիճանը բարձրացել է 1,39°C-ով՝ 1981-2010 թվականների միջինի համեմատ: Տարածաշրջանի բոլոր մասերում գրանցվել է +38 աստիճան, մասնավորապես՝ Ռուսաստանի Վերխոյանսկում, որն Արկտիկական շրջանից հյուսիս նախկինում գրանցված ամենաբարձր հայտնի ջերմաստիճանն է:
«2020 թվականին Ասիայում եղանակային աղետները և կլիմայի փոփոխությունը հազարավոր կյանքեր է խլել, միլիոնավոր մարդիկ լքել են իրենց տները, միլիարդավոր դոլարների կորուստներ կրել՝ լուրջ վնաս հասցնելով ենթակառուցվածքներին և էկոհամակարգերին»,- ասվում է WMO զեկույցում:
Կառույցի տվյալներով՝ արդյունքում բացարձակ թվով ամենամեծ տնտեսական կորուստները կրել է Չինաստանը՝ 238 միլիարդ դոլար, որին հաջորդում են Հնդկաստանը՝ 87 միլիարդ դոլար, Ճապոնիան՝ 83 միլիարդ դոլար, Հարավային Կորեան՝ 24 միլիարդ դոլար։
Այնուամենայնիվ, հաշվի առնելով երկրների տնտեսության չափը, Տաջիկստանն ամենաշատն է տուժել։ Նրա կորուստները կազմում են երկրի ՀՆԱ-ի 7,9%-ը, Կամբոջայինը՝ 5,9%-ը և Լաոսինը՝ 5,8%-ը:
Կանխատեսվում է, որ ջերմաստիճանի և խոնավության բարձրացումը կհանգեցնի մայրցամաքում բացօթյա աշխատանքի ժամանակի իրական կորստի, որը կարող է արժենալ միլիարդավոր դոլարներ: Զեկույցի համաձայն՝ 2020 թվականին ջրհեղեղներից ու փոթորիկներից Ասիայում տուժել է 50 միլիոն մարդ, իսկ ավելի քան 5000 մարդ զոհվել է:
Միևնույն ժամանակ, 2020 թվականին Հնդկական, Խաղաղ և Հյուսիսային սառուցյալ օվկիանոսներում ջրի մակերևույթի միջին ջերմաստիճանը հասել է ռեկորդային մակարդակի․ Ասիայի շրջակայքի ջրի մակերեսը ավելի շատ է տաքացել, քան ամբողջ աշխարհում: Արաբական ծովում և մասամբ Հյուսիսային սառուցյալ օվկիանոսում ջերմաստիճանի բարձրացումը միջինից երեք անգամ ավելին է եղել։
Բացի այդ, արձանագրվել է լեռնային սառցադաշտերի նվազում։ Փորձագետները կարծում են, որ դրանց զանգվածը մինչև 2050 թվականը կկրճատվի մինչև 40 տոկոսի՝ ազդելով տարածաշրջանի 750 միլիոն բնակչի կենսակերպի վրա։
Տաթև Ֆռանգյան
