18.01.2026 | 14:06
Թրամփը ցանկանում է մեկ միլիարդ դոլար երկրներից՝ իր ստեղծած Խաղաղության խորհրդում մշտական անդամակցության համար
Էրդողանը հայտարարել է, որ դեսպանների արտաքսման հետ կապված դիվանագիտական ճգնաժամը հանգուցալուծված է
Քաղաքականություն
25.10.2021 | 21:45
Թուրքիայի նախագահ Ռեջեփ Թայիփ Էրդողանը հայտարարել է, որ արևմտյան 10 երկրների դեսպաններին «պերսոնա նոն գրատա» («անցանկալի անձ») հայտարարելու հետ կապված ճգնաժամը լուծված է, գրում է ՌԻԱ Նովոստին։
«Որոշ երկրների դեսպաններ մեր ինքնիշխանությունն են թիրախավորել։ Այդպիսի հայտարարությունները մեծ վիրավորանք են մեր դատավորների, փաստաբանների համար։ Թուրքական դատարանն անկախ է և ոչ մեկի հրամանները չի կատարում։ Դրա համար այդպիսի վիրավորանքների պատասխանելը մեր պարտականությունն է։ Մենք մտադիր չենք ճգնաժամ ստեղծել, սակայն ցանկանում ենք պաշտպանել մեր երկրի հպարտությունը։ Եվ այսօր դեսպանությունների հայտարարությամբ իրավիճակը հանգուցալուծվել է»,- ասել է Էրդողանը։
Նա նշել է, թե կարծում է՝ դեսպաններն այսուհետ ուշադիր կլինեն Թուրքիայի մասին իրենց հայտարարություններում։
Նշենք, որ Թուրքիայում ԱՄՆ-ի, Կանադայի ու արևմտյան այլ երկրների դեսպանատները նոր հայտարարություն էին տարածել, որում հայտնում են, որ մտադիր են հարգել ընդունող պետության օրենքներն ու կանոնակարգերը և չխառնվել այդ երկրին ներքին գործերին։
Մինչ այդ, Էրդողանը ԱԳՆ-ին հանձնարարել էր երկրից վտարել ու «անցանկալի անձ» ճանաչել ԱՄՆ-ի և արևմտյան այլ երկրների դեսպաններին այն բանից հետո, երբ նրանք միասնական հայտարարություն էին տարածել ակտիվիստ Օսման Քավալային ազատ արձակելու կոչով։ Խոսքն ԱՄՆ-ի, Գերմանիայի, Դանիայի, Ֆինլանդիայի, Ֆրանսիայի, Նիդերլանդների, Շվեդիայի, Կանադայի, Նորվեգիայի, Նոր Զելանդիայի դեսպանատների մասին է։
Էմմա Չոբանյան
