Քաղաքականություն
24.10.2021 | 21:25
Առաջիկա տասնամյակներում մոլորակի կլիմայի փոփոխության պատճառով աշխարհին գլոբալ ռազմական հակամարտություն է սպառնում, ասված է ԿՀՎ-ի հրապարակած զեկույցում։
«Կլիմայի փոփոխության ուժգնացող ֆիզիկական հետևանքները կարող են սրել անդրսահմանային աշխարհաքաղաքական թեժ կետերը, քանի որ պետությունները քայլեր են ձեռնարկում իրենց շահերը պաշտպանելու համար»,- «ՌԻԱ Նովոստի»-ի փոխանցմամբ՝ նշվում է փաստաթղթում:
Հեղինակների կարծիքով ՝ 2040 թվականից ոչ ուշ «կլիմայական բախումներ» կսկսվեն աշխարհում, որոնց դեպքում կողմերը միմյանց դեմ կկիրառեն տեխնոլոգիաներ, որոնք կուժեղացնեն տարերային աղետները, ինչպիսիք են երաշտը և հեղեղումները: Խոսքը առաջին հերթին գեոինժեներային տեխնոլոգիաների մասին է։
Մասնագետները նաև նախազգուշացրել են Կլիմայի վերաբերյալ Փարիզյան համաձայնագրի իրագործման շուրջ վեճերի պատճառով երկրների միջև լարվածության աճի մասին։ Կլիմայի վերաբերյալ Փարիզյան համաձայնագրի իրագործումը ենթադրում է ջերմոցային գազերի արտանետումների կրճատում գլոբալ տաքացումը կանխելու համար:
«Շատ երկրներ կկանգնեն դժվարին տնտեսական ընտրության առջև և, ամենայն հավանականությամբ, կապավինեն տեխնոլոգիական թռիչքի, որպեսզի հետո արագ կրճատեն իրենց արտանետումները։ Չինաստանն ու Հնդկաստանը վճռորոշ դեր կխաղան ջերմաստիճանի բարձրացման հետագիծը որոշելիս», — ասված է փաստաթղթում։
Բացի այդ, զեկույցի հեղինակները հայտարարել են կլիմայի փոփոխության հետևանքների պատճառով զարգացող երկրներում ներքին հակամարտությունների ռիսկի մասին, քանի որ այդ պետություններն ավելի քիչ կարող են հարմարվել նոր պայմաններին:
Կլիմայական պատերազմում հնարավոր ապագա թեժ կետերի թվում են այնպիսի տարածաշրջաններ, ինչպիսիք են Կոնգո, Ինդոս, Մեկոնգ և Նեղոս գետերի ավազանները: Հակամարտություններն այնտեղ կարող են բռնկվել գետերի հունի փոփոխության և ջրի հոսքի վերաուղղորդման պատճառով:
Զեկույցում նշված է 11 երկիր, որոնց վրա առավել շատ են ազդում կլիմայի գլոբալ փոփոխությունների բացասական հետևանքները: Վերլուծաբանների կարծիքով ՝ այդ պետությունները կարող են ծայրահեղ միջոցների դիմել հանուն գոյատևման։ Խոսքը, մասնավորապես, միջուկային զենք ունեցող երկրների՝ Չինաստանի, Հնդկաստանի և Պակիստանի, ինչպես նաև Աֆղանստանի, Հյուսիսային Կորեայի, Մյանմայի և Կենտրոնական և Հարավային Ամերիկայում մի շարք երկրների մասին է:
