Քաղաքականություն
22.10.2021 | 22:32
Փողերի լվացման դեմ պայքարի ֆինանսական գործողությունների խումբը (FATF) Թուրքիան ներառել է «մոխրագույն ցուցակում», քանի որ չի ստուգել ահաբեկչության ֆինանսավորումը։ Այս մասին հայտնում է «Ահվալ»-ը՝ վկայակոչելով France Press գործակալությանը։
FATF-ի ղեկավար Մարկուս Փլեյերն ասել է, որ Թուրքիան ֆինանսական գործարքների նկատմամբ շարունակում է ունենալ լուրջ խնդիրներ։ Նա նշել է, որ Թուրքիայի կառավարությունը պարտավորություն է ստանձնել փողերի լվացման դեմ պայքարում։
«Ես կոչ եմ անում նրանց՝ պարտավորությունը վերածել գործողության»,- ասել է նա։
«Մոխրագույն ցուցակում» հայտնվելը կարող է Թուրքիայի՝ առանց այն էլ դժվար վիճակում գտնվող տնտեսության համար արժենալ ՀՆԱ-ի 3 տոկոսը՝ շուրջ 23 մլրդ դոլար։
Դեռևս 2019 թվականիզեկույցում FATF-ն ասում էր, որ Թուրքիան պետք է ավելին անի ահաբեկչության ու զանգվածային ոչնչացման զենքի հետ կապված ակտիվների սառեցման հարցում։
«Իր աշխարհագրական դիրքի պատճառով երկիրը բախվում է փողերի լվացման ամենամեծ ռիսկին՝ թմրամիջոցների ապօրինի շրջանառության, միգրանտների մաքսանենգության, մարդկանց թրաֆիքինգի և վառելիքի մաքսանենգության արդյունքում»,- ասվում էր զեկույցում։
Անկարայի դաշնակից Պակիստանը ևս մնացել է «մոխրագույն ցուցակում»։ Նախորդ տարի Թուրքիայի նախագահ Ռեջեփ Թայիփ Էրդողանը նույնիսկ ասել էր, որ կառավարությունը կօգնի Պակիստանին դուրս գալ ցուցակից։
Բացի այդ, այս ցանկում ներառվել են Հորդանանն ու Մալին։
Էմմա Չոբանյան
