01.04.2026 | 23:17
ԵՄ առաքելության գործունեությունը կարևոր է Հայաստանի քաղաքացիների համար. ՀՀ նախագահն ընդունել է Սատու Կոյվուին
Ադրբեջանը դիմել է Google Maps-ին՝ Արցախի հայկական տեղանունները փոխելու համար
Քաղաքականություն
22.10.2021 | 19:29
Ադրբեջանը դիմել է Google ընկերությանը՝ Արցախի հայկական տեղանունները փոխելու համար, որոնք, ըստ ադրբեջանական կողմի, սխալ են արտացոլված Google Maps-ում։ Այս մասին «Սպուտնիկի» ադրբեջանական ծառայության հետ զրույցում ասել է երկրի Մշակույթի նախարարությանն առընթեր մշակութային ժառանգության պահպանման, զարգացման և վերականգնման պետական ծառայության ղեկավար Ազադ Ջաֆարլին։
Համաշխարհային քարտեզագրման վիրտուալ ծառայությունում օգտագործվում են Արցախում գտնվող բնակավայրերի և պատմական հուշարձանների հայկական անվանումները, ինչը դուր չի գալիս Ադրբեջանին՝ չնայած Արցախի մի մասը գտնվում է ադրբեջանական օկուպացիայի տակ։
«Հանրահայտ Google Maps-ում բոլոր անվանումներն ադրբեջաներեն տարբեերակով փոխարինելու համար ժամանակ է պետք։ Մենք անում ենք հնարավորը, որ կարճ ժամանակում Ղարաբաղի բոլոր տեղանքներն ու հուշարձանները թարգմանվեն մեր լեզվով, որ չշփոթվեն ո՛չ մեր, ո՛չ արտասահմանցիների կողմից։ Ամբողջ աշխարհը պետք է իմանա, որ այդ տարածքները պատկանում են Ադրբեջանին։ Ցավոք, ամեն ինչ այդքան էլ հեշտ չէ։ Մենք հիմա բանակցություններ ենք վարում Google Maps-ի մշակողների հետ։ Որքան ժամանակ այն կպահանջի՝ հայտնի չէ»,- ասել է Ջաֆարլին։
Նշենք, որ Արցախյան 44-օրյա պատերազմից հետո Ադրբեջանում պահանջում են Google Maps-ում փոխել Լեռնային Ղարաբաղի բնակավայրերի երկլեզու անունները և միայն ադրբեջաներեն տարբերակը թողնել։ Այս խնդրով նույնիսկ զբաղվում է Ադրբեջանի ԱԳՆ-ն։
Ամիսներ առաջ Ադրբեջանի ԱԳՆ մամուլի ծառայության ղեկավար Լեյլա Աբդուլլաևան իր հերթին էր ասել, որ կա Լեռնային Ղարաբաղի բնակավայրերի երկակի անվանումների խնդիր։
«ԱԳՆ-ն երկար տարիներ Google-ին և այլ առցանց ռեսուրսների հղում է գրավոր բողոքներ՝ պահանջելով դադարեցնել Ադրբեջանի քարտեզներում օտար անվանումներ ու այբուբեն օգտագործել։ Մեր ջանքերը միշտ չէ, որ օգուտ են բերում, քանի որ Google-ը ոչ կառավարական կազմակերպություն է»,- նշել էր Աբդուլլաևան։
Էմմա Չոբանյան
