09.06.2026 | 00:17
Մարկո Ռուբիոն շնորհավորել է Փաշինյանին
Քաբուլում կանայք ԱԳՆ-ի շենքի դիմաց բողոքի ցույցի են դուրս եկել․ ակցիան լուսաբանող լրագրողները ծեծի են ենթարկվել
Քաղաքականություն
21.10.2021 | 14:03
Մի քանի տասնյակ կանայք հինգշաբթի բողոքի ակցիա են իրականացրել Քաբուլում՝ Աֆղանստանի ԱԳՆ-ի շենքի մոտ։ Թալիբները ցրել են ցույցը և ծեծել այն լուսաբանող լրագրողներին: Այս մասին «ՌԻԱ Նովոստիին» պատմել է ականատեսներից մեկը։
Նրա խոսքով՝ կանայք բողոքի ցույցի են դուրս եկել իրենց իրավունքների համար։
««Թալիբան»-ը փորձել է կանգնեցնել նրանց և ծեծի է ենթարկել ցանկացածին, որը փորձել է նկարահանել այն, ինչ տեղի էր ունենում»,- ասել է աղբյուրը:
Ըստ ականատեսի՝ ցուցարարների թիվը չի գերազանցել 30-ը, թալիբները ցրել են բողոքի ակցիան, ինչի պատճառով ցույցը տեղափոխվել է մեկ այլ փողոց։ Գործակալության զրուցակիցը հավելել է, որ լուսանկարող ու տեսանկարահանող լրագրողները ծեծի են ենթարկվել, նրանցից խլել են նաև տեսախցիկները։
Հիշեցնենք՝ թալիբները խոստացել էին, որ կանանց իրավունքները պաշտպանվելու են, սակայն իսլամի շրջանակում։ Նրանք նաև խոստացել էին համապատասխան կանոններ մշակել կանանց համար՝ իրենց աշխատանքը կատարելու համար։ Կանայք արդեն մի քանի անգամ ցույցեր են անցկացրել Աֆղանստանի մի քանի քաղաքներում՝ կոչ անելով նոր իշխանություններին հարգել իրենց իրավունքները և ապահովել իրենց ներկայացվածությունը կառավարությունում ու տեղական իշխանություններում:
Տաթև Ֆռանգյան
