Քաղաքականություն
21.10.2021 | 23:35
Չինաստանի զինվորականները 2021 թվականի ամռան ընթացքում գերձայնային զենքի երկու փորձարկում են անցկացրել, գրում է Financial Times-ը՝ վկայակոչելով իրազեկ աղբյուրներին։
Ավելի վաղ՝ հոկտեմբերին պարբերականը հայտնել էր, որ ՉԺՀ-ն միջուկային զենք կրելու ունակություն ունեցող գերձայնային հրթիռ է փորձարկել, և դա անակնկալի է բերել ամերիկյան հետախուզությանը:
Ըստ պարբերականի աղբյուրների՝ հրթիռը չի հասել իր արևմտյան թիրախին, սակայն փորձարկումը ցույց է տվել, որ Չինաստանը «զարմանալի առաջընթաց է գրանցել գերձայնային զենքի մշակման գործում» և շատ ավելի առաջ է գնացել, քան կարծում էին ամերիկացիները:
Պենտագոնը մտահոգություն է հայտնել Չինաստանի գործողությունների կապակցությամբ, սակայն չի մեկնաբանել գերձայնային հրթիռի փորձարկման մասին հաղորդագրությունը։
Ավելի ուշ Չինաստանի ԱԳՆ խոսնակ Չժաո Լիջիանը տեղեկացրել է, որ Պեկինն այս տարվա օգոստոսին տիեզերանավ է փորձարկել, այլ ոչ թե գերձայնային հրթիռ:
Այժմ պարբերականին հայտնի է դարձել, որ Չինաստանը երկու անգամ է փորձարկում արել: Առաջինը տեղի է ունեցել, ըստ աղբյուրների, ոչ թե օգոստոսին, այլ հուլիսի 27-ին: Ըստ ԱՄՆ հետախուզության գնահատականներին ծանոթ չորս անձի՝ ՉԺՀ-ի զինված ուժերը «մասնակի ուղեծրային ռմբակոծման» համակարգով հրթիռ են արձակել՝ Երկրի շուրջ «գերձայնային թռչող սարքավորում» արձակելու համար, որը կարող է միջուկային զենք կրել:
Օգոստոսի 13-ին էլ Չինաստանը գերձայնային զենքի երկրորդ փորձարկումն է անցկացրել: Թե ինչ տեսակի զենք է դա եղել, հաղորդագրության մեջ չի նշվում: Այնուամենայնիվ, հուլիսյան փորձարկումներին ծանոթ երեք անձ հրատարակությանը հայտնել է, որ արձակումն ապշեցրել է ԱՄՆ Պաշտպանության նախարարությանը և ամերիկյան հետախուզությանը, քանի որ Չինաստանը ցուցադրել է զենքի նոր հնարավորություններ:
Տաթև Ֆռանգյան
