Քաղաքականություն
20.10.2021 | 21:58
Թուրքիայի նախագահ Ռեջեփ Թայիփ Էրդողանը, 2022 թվականի պետական բյուջեի առաջարկի համաձայն, ցանկանում է սեփական աշխատավարձը 14․4 տոկոսով բարձրացնել։ Առաջարկը ներկայում երկրի խորհրդարանում է, հայտնում է Duvar-ը։
Առաջարկը նախատեսում է նախագահի ամսական աշխատավարձը 88․000 լիրայից հասցնել 100․000 լիրայի։
«Այս մարդը ժլատ է, երբ հերթը հասնում է բանվորներին ու այլ աշխատողներին, սակայն շատ առատաձեռն է իր նկատմամբ։ Պալատն ավելի շքեղ է դառնում, մարդիկ ավելի են աղքատանում»,- թվիթերյան իր էջում գրել է ընդդիմադիր Ժողովրդահանրապետական կուսակցության խմբակցության նախագահի տեղակալ Օզգյուր Օզելը և ներկայացրել Էրդողանի աշխատավարձի բարձրացման տվյալները 2018 թվականից ի վեր, երբ Էրդողանի աշխատավարձը կազմել է 59․000 թուրքական լիրա։
Աշխատավարձի բարձրացման լուրը դժգոհություն է առաջացրել հանրության շրջանում, քանի որ Թուրքիայում սոցիալ-տնտեսական վիճակն այժմ բավական լարված է։
Էմմա Չոբանյան
