Քաղաքականություն
20.10.2021 | 22:21
Սիրիայում քրդական Ժողովուրդների պաշտպանական միավորումը սպասում է վտանգավոր գործարքի Թուրքիայի ու Ռուսաստանի միջև՝ նոր ռազմական հարձակման հետ կապված։ Այս մասին ասել է միավորման խոսնակ Նուրի Մեհմուդը, գրում է Bianet-ը։
Իրաքի Քուրդիստանում գտնվող RojNews գործակալությանը Մեհմուդն ասել է, որ Թուրքիան զորքեր է տեղակայել Ադրբեջանում, Իրաքում և Լիբիայում՝ փորձելով ընդլայնել իր սահմանները։
«Կան շատ ճգնաժամեր Թուրքիայում։ Թուրքական ընդդիմությունը և, ընդհանրապես, թուրք ժողովուրդը ցանկանում են փոխել ֆաշիստական և ջիհադիստական համակարգը: Մյուս կողմից՝ Էրդողանը պատերազմական քաղաքականություն է վարում գոյատևելու համար»,- ասել է Մեհմուդը։
Նա Սիրիայի կառավարությանը մեղադրել է «անապատասխանատու» և Ռուսաստանի ու Իրանի շահերին համապատասխան գործելու համար՝ հավելելով, որ Ռուսաստանը միայն իր շահերն է առաջ տանում և որևէ քայլ չի արել Սիրիայի ժողովրդի օգտին։
Մեհմուդի խոսքով՝ կանխատեսում են, որ Անկարան ու Մոսկվան «վտանգավոր գործարքի» կգնան՝ ինչպես ժամանակին Աֆրինում։ 2018 թվականին Թուրքիան գրավեց Սիրիայի հյուսիս-արևմուտքում քրդաբնակ Աֆրին քաղաքը՝ երկու ամիս տևած հարձակումից հետո։
«Ռոջավայի հեղափոխությունից հետո մենք մոտ 10 տարի օգտվել ենք ինքնապաշտպանության մեր իրավունքից։ Բացի այդ, մենք չենք հարձակվել որևէ կողմի վրա»,- ասել է Նուրի Մեհմուդը։
Նշենք, որ Թուրքիայի նախագահ Ռեջեփ Թայիփ Էրդողանն ավելի վաղ հայտարարել էր, որ Սիրիայի հարցով «Անկարայի համբերությունը սպառվել է» և շուտով նոր մակարդակի կբարձրացնեն իրենց գործողությունները։ Թուրքիայի ԱԳ նախարար Մևլութ Չավուշօղլուն էլ ՌԴ-ին և ԱՄՆ-ին մեղադրել էր Սիրիայի հարցով խոստումները չկատարելու մեջ։ Թուրքիայի տարբեր բարձրաստիճան պաշտոնյաների նման հայտարարությունները փորձագետները դիտարկում են Սիրիայում թուրքական հարձակման նախազգուշացում։
Էմմա Չոբանյան
