Ո՞ւմ հետ կհամագործակցեն Գյումրու ավագանու կազմում ընդգրկվող «Զարթոնք»-ն ու ՀՀԿ-ն

Գյումրու ՏԻՄ ընտրություններում 10,6 տոկոս ձայն հավաքած, երրորդ տեղը զբաղեցնող քաղաքական ուժը՝ «Զարթոնք» կուսակցությունը, հանուն Գյումրու զարգացման պատրաստ է համագործակել ավագանու կազմում ընդգրկվող բոլոր քաղաքական ուժերի հետ։

Այս մասին Factor.am-ի հետ զրույցում ասաց «Զարթոնք» կուսակցության ավագանու ցուցակի առաջին համարը զբաղեցնող ԱԱԾ-ի նախկին աշխատակից, պահեստազորային սպա, փոխգնդապետ Վարդևան Հակոբյանը։

Մեր հարցին՝ արդյո՞ք բացառում են համագործակցությունը «Քաղաքացիական պայմանագիր» կուսակցության հետ, ինչպես հարցազրույցներում ասել էր «Զարթոնք» ազգային-քրիստոնեական կուսակցության նախագահ Արա Զոհրաբյանը,Վարդևան Հակոբյանը պատասխանեց՝ չի ուզում այդ հարցին անդրադառնալ, բայց իր համար կարևորը քաղաքի խնդիրներն են։

«Իմ համար ամենակարևորը քաղաքի խնդիրների լուծումն է, ես քաղաքական մարդ չեմ, և այդ սկզբունքով եմ մասնակցել ընտրությունների։ Քաղաքի կառուցման համար ես պատրաստ եմ բոլորի հետ աշխատել։ Անելու ենք այն, ինչը որ արդար է և ազնիվ, իսկ այն, ինչ անարդար է, մերժելու ենք առաջին իսկ օրվանից։ Մենք ժողովրդի աչքերին նայելու ենք և պետք է նայենք, իսկ մարդկանց վստահությունը ստանալու համար պիտի ցույց տաս քո աշխատանքը»,-ասաց Վարդևան Հակոբյանը։

ՀՀԿ-ի ավագանու ցուցակը գլխավորող Արտյոմ Ղուկասյանն էլ ասաց, որ ՔՊ-ի հետ համագործակցությունը բացառում են, իսկ մյուս քաղաքական ուժերի հետ մասով քննարկում չեն արել։
«Մնալով ընդդիմադիր՝ կտեսնենք այդ դաշտում միասնական կգործե՞նք, թե՞ ամեն ուժ իր համար, թող պաշտոնապես հաստատեն արդյունքները, նոր կորոշենք»,-ասաց Արտյոմ Ղուկասյանը։
Նշենք, որ ՀՀԿ-ն զբաղեցրել է 5-րդ տեղը, հավաքել է ձայների 5,06 տոկոսը, նախնական հաշվարկներով կստանա երկու մանդատ Գյումրու ավագանու կազմում։

Հիշեցնենք, նախնական տվյալներով առաջին տեղում «Բալասանյան դաշինք» սոցիալական կուսակցությունն է, որը ստացել է ձայների 36,59 տոկոսը, երկրորդ տեղում «Քաղաքացիական պայմանագիր» կուսակցությունը, որը հավաքել է 29,56 տոկոս։
3-րդ տեղում «Զարթոնք» կուսակցությունն է՝ 10,6 տոկոս, 4-րդ տեղում «Ապրելու երկիր» կուսակցությունն է՝ 5,65 տոկոս։ Իսկ 5-րդ տեղում ՀՀԿ-ն է՝ 5,06 տոկոս։

Նախնական հաշվարկներով, «Բալասանյան դաշինք» սոցիալական կուսակցությունը կստանա 14 մանդատ, ՔՊ-ն՝ 11, «Զարթոնքը»՝ 4, «Ապրելու երկիր» և «Հայաստանի Հանրապետական» կուսակցությունը՝ 2 մանդատ։

Արմիկ Մովսիսյան