03.07.2026 | 05:09
ԱԱ-2026. Պորտուգալիան հաղթանակ կորզեց ու կխաղա Իսպանիայի հետ. ՏԵՍԱՆՅՈՒԹ
Հաշմանդամություն ունեցող աղջկա նպաստը կվերականգնեն. Սոցապնախարարությունը արձագանքել է Factor.am-ի հրապարակմանը
Հասարակություն
27.03.2018 | 19:53
Երեկ անդրադարձել էինք նախկին ազատամարտիկ, ապրիլյան պատերազմի մասնակից Մարգո Բաբայանի և նրա՝ հաշմանդամություն ունեցող դստեր՝ Մարիամ Օհանջանյանի ճակատագրին, նկարագրել էինք, թե ինչ բարդ իրավիճակում է հայտնվել ընտանիքը:
Մարիամը 21 տարեկան է, սայլակին գամված, տառապում է անբուժելի հիվանդությամբ՝ ուղեղի մանկական պարալիչ և ստորին ծայրանդամների թուլություն: Մինչև 16 տարեկանը աղջիկը հաշմանդամության նպաստ էր ստանում, սակայն արդեն մի քանի տարի է, զրկված է նպաստից, որը մոր և դստեր միակ կայուն եկամուտն էր: Մարգո Բաբայանը պատմել էր Factor.am -ին, որ Սյունիքի մարզի Ակներ համայնքում, որտեղ աղջիկը ծնվել է, նրա հիվանդության պատմությունը կորցրել են, և այժմ ազատամարտիկ կինը քաշքշուկի մեջ է ընկել: Նրան ոչ մի կերպ չի հաջողվում վերստին հաշմանդամության փաստաթղթեր ստանալ և վերականգնել Մարիամի նպաստը: Պոլիկլինիկաներում նոր փաստաթղթեր չեն տալիս, հրաժարվում են կրկին ստուգել հաշմանդամ երեխային, կնոջը տեղից տեղ են ուղարկում, ինչ-որ թղթեր են պահանջում, որոնք նա չի կարողանում հայթհայթել:
Factor.am-ի պատրաստած ռեպորտաժի հեռարձակումից հետո տեղեկացանք, որ այսօր հաշմանդամ աղջկան և նրա մորը հրավիրել են Մասիսի բժշկասոցիալական փորձաքննության հանձնաժողով: Մարգարիտա Բաբայանը դիմում է գրել փորձաքննություն նշանակելու վերաբերյալ և առաջիկայում Մասիսի կամ Խարբերդի պոլիկլինիկայի մասնագետները կուսումնասիրեն Մարիամի առողջական վիճակը: Հանձնաժողովի նախագահը նույնիսկ խոստացել է անձամբ հետևել, որ նրան բժշկական փաստաթղթեր տան:
Այս մասին Factor.am-ին հայտնեց աշխատանքի և սոցիալական հարցերի նախարարության բժշկասոցիալական փորձաքննության գործակալության համակարգող Անուշ Սիմոնյանը:
Սյուզան Սիմոնյան
