Քաղաքականություն
18.10.2021 | 13:46
Ադրբեջանի ԱԳ նախարար Ջեյհուն Բայրամովը Կատարի իր գործընկերոջ՝ շեյխ Մոհամմեդ բին Աբդուլռահմանի հետ կայացած մամուլի ասուլիսի ընթացքում հայտարարել է, թե Հայաստանը ձգձգում է եռակողմ հայտարարությունների կատարումը՝ խաթարելով տարածաշրջանի կայունությունն ու անվտանգությունը։ Այս մասին հաղորդում են ադրբեջանական լրատվամիջոցները։
«Ցավոք, դեռ չի հաջողվել հասնել կոնկրետ արդյունքների այն հարցերի շուրջ, որոնք բխում են եռակողմ հայտարարությունից։ Մենք դեռ չենք նկատում գործնական քայլեր Հայաստանի կողմից»,- ասել է Բայրամովը։
Բացի այդ, Ադրբեջանի ԱԳ նախարարը նաև սպառնացել է Հայաստանին։
«Մեր խորհուրդն է Հայաստանում ռևանշիստական ուժերին՝ չգնալ սխալ ճանապարհով։ Ստորագրված փաստաթուղթը կարևոր է իրագործել»,- ասել է Բայրամովը։
Հավելենք, որ ադրբեջանական կողմը գրեթե մեկ տարի է՝ չի կատարում նոյեմբերի 9-ի Հայաստանի, ՌԴ-ի և Ադրբեջանի ղեկավարների ստորագրած եռակողմ հայտարարության 8-րդ դրույթն ու շարունակում է ապօրինաբար պահել հայ ռազմագերիներին ու պատանդներին։
Էմմա Չոբանյան
