25.04.2026 | 18:02
Փաշինյանը ներկա է գտնվել Մալխաս և Ռոման Ամոյանների անվան նոր մարզադպրոցի հիմնարկեքի արարողությանը
Չինաստանի և ՌԴ-ի կարողությունների զարգացմանը հակազդելը կներառվի ՆԱՏՕ-ի նոր ռազմավարական հայեցակարգում․ FT
Քաղաքականություն
18.10.2021 | 22:39
Չինաստանի կարողությունների զարգացմանը հակազդելը կներառվի ՆԱՏՕ-ի նոր ռազմավարական հայեցակարգում, որը նախատեսվում է ներկայացնել 2022 թվականին: Այս մասին հայտարարել է դաշինքի գլխավոր քարտուղար Յենս Ստոլտենբերգը Financial Times-ին տված հարցազրույցում:
«ՆԱՏՕ-ն Հյուսիսային Ամերիկայի և Եվրոպայի դաշինքն է, և այս տարածաշրջանը կանգնած է գլոբալ մարտահրավերների առջև՝ ահաբեկչություն, կիբերանվտանգություն, իսկ այժմ՝ նաև Չինաստանի վերելքը»,- ընդգծել է Ստոլտենբերգը:
Հյուսիսատլանտյան դաշինքի ղեկավարը պարզաբանել է, որ սխալ կլինի Չինաստանին և Ռուսաստանին դիտարկել որպես առանձին սպառնալիքներ, քանի որ այդ երկրները սերտորեն համագործակցում են:
«Չինաստանը մեզ ավելի է մոտենում: Մենք նրանց տեսնում ենք Արկտիկայում, տեսնում ենք կիբեր տարածությունում: Մենք տեսնում ենք, որ նրանք մեծ ներդրումներ են կատարում մեր երկրների կարևոր ենթակառուցվածքներում: Եվ, իհարկե, նրանք ունեն ավելի ու ավելի մեծ հեռահարության զենք, որը կարող է հասնել ՆԱՏՕ-ի դաշնակից բոլոր երկրներին: Նրանք կառուցում են շատ ու շատ պահուստարաններ հեռահար միջմայրցամաքային հրթիռների համար»,- ասել է նա:
Տաթև Ֆռանգյան
