Բաքվի «ռազմավարի պուրակից» հայ զինվորների մանեկեններն ու սաղավարտները ժամանակավոր են հեռացվել․ ԼՈւՍԱՆԿԱՐՆԵՐ

Հաագայի դատարանում Հայաստանի կառավարության ներկայացուցիչ Եղիշե Կիրակոսյանը նախօրեին հայտնել էր, որ Բաքվի այսպես ասած «ռազմավարի պուրակից» հեռացվել են հայ զինվորիների մանեկեններն ու սաղավարտները։

«Ադրբեջանական կողմը հավաստում է ներկայացրել, որ այդ «ռազմավարի պուրակից» հանվել են մանեկենները, սաղավարտները: Դա կարևորագույն հանգամանք է շեշտելու համար, որովհետև փաստացի դա կատարվել է Հայաստանի կողմից հայցը ներկայացնելուց հետո ընկած ժամանակահատվածում», – ասել է Արդարադատության միջազգային դատարանում ՀՀ շահերի ներկայացուցիչը:

Այս փաստը ողջունել էր նաև վարչապետ Փաշինյանը ԱՊՀ ղեկավարների խորհրդի նիստում ելույթի ժամանակ։

Ադրբեջանական Mikroskop լրատվամիջոցի լրագրողն այսօր այցելել է պուրակ՝ տեսնելու՝ արդյոք սաղավարտներն ու մանեկեններն իսկապես հեռացվել են։

Լրագրողy տեսել է, որ դրանք իսկապես հեռացվել են պուրակից, սակայն, ինչպես պարզվել է, դա ժամանակավոր բնույթ է կրում։

Պուրակի աշխատակիցները պատմել են լրագրողին, որ մանեկենները պատրաստված են մոմանյութից ու ուղարկվել են վերանորոգման, քանի որ այցելուները շատ են դիպչում դրանց։ Աշխատակիցները նաև ասել են, որ հայ զոհված զինծառայողների սաղավարտները ևս ուղարկվել են վերանորոգման և հայտնի չէ, երբ են վերադարձվելու։

Նշենք, որ Հայաստանը ՄԱԿ-ի Արդարադատության դատարանին ուղղված հայցում պահանջում է պուրակն ամբողջությամբ փակել։

Հիշեցնենք, որ Բաքվում 2021թ. ապրիլին է բացվել նշյալ պուրակը, որտեղ ներկայացված են Արցախյան երկրորդ պատերազմում ադրբեջանական կողմի ձեռք բերած ռազմական տեխնիկան, ինչպես նաև հայ զինվորներին պատկերող մանեկենները՝ նրանց ծաղրող, նրանց արժանապատվությունը ոտնահարող, նվաստացուցիչ կերպարներով:

Էմմա Չոբանյան