10.07.2026 | 11:14
Դատախազությունը դատարան է ուղարկել ընտրական հանցագործությունների 43 գործ․ մեղադրյալների թվում՝ 153 անձ
Սերժ Սարգսյանը 100-ից 80 խփելու փո՞րձ, թե՞ «թարս խիարների» մասին նոր տեսություն է ցանկանում մշակել
Քաղաքականություն
26.03.2018 | 19:42
Քաղաքագետ, «Մերժիր Սերժին» նախաձեռնության անդամ Արմեն Գրիգորյանը կարծում է, որ հասարակության մեջ կա տրամադրվածություն, որպեսզի Սերժ Սարգսյանը հեռանա։ Մարտի 24-ին տեղի ունեցած «#մերժիրսերժին» կարգախոսով երթը, քաղաքագետի գնահատմամբ, հաջողված էր՝ դատելով արձագանքներից։ Գրիգորյանը նշում է՝ ապրիլի 9-ին պատրաստվում են հերթական հանրահավաքն անցկացնել, իսկ մինչ այդ պլանավորվում են մի շարք այլ ծրագրեր՝ հասարակության իրազեկվածությունը բարձրացնելու համար։ Սերժ Սարգսյանին մերժելու բազմաթիվ պատճառներ կան, պնդում է քաղաքագետը, ապա թվարկում դրանցից մի քանիսը․ «Սերժ Սարգսյանի կառավարման 10 տարիների ընթացքում 370 հազար քաղաքացի է արտագաղթել, 5 միլիարդ պետական պարտք է ավելացել, 1 միլիոն աղքատ կա, տարածքային կորուստներ ենք ունեցել, ապրիլյան պատերազմն է եղել, Սերժ Սարգսյանը մեկ գիշերվա մեջ Հայաստանը մտցրել է ԵՏՄ, կարելի է անվերջ թվարկել Սերժ Սարգսյանի ավերածությունները՝ բոլոր ոլորտներում»։
Հարցին, եթե ոչ Սերժ Սարգսյանը, ապա՝ ո՞վ, Գրիգորյանը պատասխանում է․ «Հայաստանի ցանկացած քաղաքացի։ Անփոխարինելիի սինդրոմից պետք է ազատվել»։ ՀՀԿ-ականների պնդումներին, թե Սերժ Սարգսյանն անփոխարինելի է երկրի անվտանգության հարցում, քաղաքագետը հակադարձում է․ «Սերժ Սարգսյանն ամենամեծ մարտահրավերն է մեր անվտանգությանը»։
Սերժ Սարգսյանը վերջերս տված հարցազրույցում ակնարկել էր, որ կդառնա վարչապետ մեկ հավելումով՝ կլծվի իր փորձը երիտասարդներին փոխանցելու գործին: Քաղաքագետ Արմեն Գրիգորյանը դա որակում է որպես բրեժնևեյան մեսիջ․ «Փորձի փոխանակումը նա կարող է կատարել ՀՀԿ-ի դպրոցում, թող գնա՝ ՀՀԿ-ի դպրոցում դա կատարի և ոչ թե վարչապետի պաշտոնում։ Ես չգիտեմ՝ ինչ փորձ է ուզում փոխանցել, 100-ից 80 խփելո՞ւ փորձ, թե թարս խիարների մասին նոր տեսություն է ցանկանում մշակել, պետք է հասկանալ»։
Մանրամասները՝ տեսանյութում։
Լիլիթ Շաբոյան
