Աշխարհում կտրուկ աճել է սովի մատնվածների թիվը․ զեկույց

Մոտ 811 միլիոն մարդ ամբողջ աշխարհում կանգնած է սովի մատնվելու խնդրի առաջ. այս ցուցանիշը 161 միլիոնով ավելի է, քան մեկ տարի առաջ էր։ Իսկ ահա 41 միլիոն մարդ սովի մատնվելու եզրին է։ Համաշխարհային ցուցանիշները ցույց են տալիս, որ մինչ 2030 թվականը 47 երկրում չի լինի անգամ սովի ցածր մակարդակ, այն կլինի «լուրջ» կամ «արտակարգ»։ Այս մասին են վկայում աշխարհում սովի մատնվածների  օգնության Welthungerhilfe կազմակերպության զեկույցի տվայլները, որն այսօր հրապարակվել է Բեռլինում։ Զեկույցում հրապարակվել է սննդի համաշխարհային պակասորդի աճը ու թվարկված են այն երկրները, որտեղ իրավիճակն առանձնակի կրիտիկական է. գրում է DW-ի ռուսական ծառայությունը։

Պատերազմները, կլիմայի փոփոխությունն ու կորոնավիրուսի համաճարակը մեծացրել են սովի մատնված մարդկանց թիվը։ Ըստ Welthungerhilfe զեկույցի՝ 2021 թվականին հակամարտությունների շրջաններում բնակվող 155 միլիոն մարդ տուժել է սուր քաղցից՝ գրեթե 20 միլիոնով ավելի, քան 2019 թվականին: Գրեթե 30 միլիոն տղամարդկանց, կանանց և երեխաների սպառնում է սով: Այսպիսով, եթե մարդկությունը շարունակի ապրել այնպես, ինչպես այժմ է, «Զրոյական սով մինչև 2030 թվականը» կայուն զարգացման նպատակին հասնել չի հաջողվի, ասվում է զեկույցում:

2021 թվականի սովի համաշխարհային ինդեքսի հրապարակման կապակցությամբ Welthungerhilfe կազմակերպությունը կոչ է արել քաղաքական գործիչներին պայքարել ճգնաժամերի դեմ, որոնք կապված են պարենի պակասորդի հետ։

Տաթև Ֆռանգյան