19.12.2025 | 23:33
ԱՄՆ-ի, Ռուսաստանի և Ուկրաինայի բանակցությունների նոր փուլը տեղի կունենա ԱՄՆ-ում առաջիկա օրերին
Իրանը հայտարարել է, որ Ադրբեջան ահաբեկիչների տեղափոխումը հաստատող ապացույցներ ունի, այդ թվում՝ ձայնագրություններ
Քաղաքականություն
12.10.2021 | 21:39
Իրանը հայտարարել է, որ ունի փաստաթղթեր, որոնք հաստատում են Արցախյան 44-օրյա պատերազմում Ադրբեջան ահաբեկչական խմբերի տեղափոխման փաստը։ Այս մասին Իրանի հանրային ռադիոյին տված հարցազրույցում հայտարարել է Իրանի ԱԳՆ պաշտոնական ներկայացուցիչ Սաիդ Խաթիբզադեն։ Գրում է Eadaily-ին։
«Իրանը ստացել է նրանց խոսակցությունների աուդիոֆայլերը ու դրանք պահում է հետախուզական ծառայությունների տեսադաշտում։ Մենք ադրբեջանական կողմին մատնանշել ենք նման գործողությունների անթույլատրելիությունը և նրանց բարձրաստիճան պաշտոնյաները խոստացել են պատասխանել մեր անհանգստություններին։ Ադրբեջանի հետ մեր հարաբերւթյունները շատ ջերմ են ու բարի, երկու կողմերի պաշտոնյաների այցերը շարունակվում են»,- ասել է Խաթիբզադեն։
Նա նաև նշել է, որ «տարածաշրջանում կան երրորդ ուժերի խմբեր, որոնք չեն ցանկանում, որ Իրանն ու Ադրբեջանը ունենան բարեկամական հարաբերություններ»։
«Համապատասխանաբար, նրան հրապարակում են կեղծ լուրեր ու փորձում ազդել երկու երկրների ժողովուրդների տրամադրությունների վրա՝ իրենց սեփական նպատակներին հասնելու համար»,- ասել է Իրանի ԱԳՆ ներկայացուցիչը՝հավելելով, որ «պատերազմը լավագույն միջոցը չէր Ղարաբաղում Ադրբեջանի իրավունքների վերականգնման համար ու Թեհրանը միշտ ընդգծել է Բաքվի ու Երևանի միջև դիվանագիտական հարաբերությունների հաստատման կարևորությունը»։
Հավելենք, որ նախօրեին Ադրբեջանի ԱԳՆ մամուլի ծառայության ղեկավար Լեյլա Ադբուլլաևան հայտարարել էր, որ Իրանը շարունակում է հակաադրբեջանական արշավն ու Ադրբեջանում ահաբեկիչների առկայության մասին անհիմն մեղադրանքներ հնչեցնում։
Էմմա Չոբանյան
