23.08.2026 | 17:17
ՃՏՊ Արմավիր-Երևան ավտոճանապարհին․ կան տուժածներ և զոհ
Ավստրիայի կանցլերը հրաժարական է տվել․ նախագահը հայտարարել է կառավարությունում ճգնաժամի ավարտի մասին
Քաղաքականություն
10.10.2021 | 21:20
Ավստրիայի դաշնային նախագահ Ալեքսանդր Վան դեր Բելենը հայտարարել է, որ երկուշաբթի տեղի կունենա նոր կանցլերի և հանրապետության ԱԳ նախարարի երդման արարողությունը, փոխանցում է «ՌԻԱ Նովոստի»-ն։
Երեկ՝ հոկտեմբերի 9-ի, Ավստրիայի կանցլեր Սեբաստիան Կուրցը հայտարարել է իր դեմ հակակոռուպցիոն դատախազության հետաքննության ֆոնին հրաժարականի մասին ՝ որպես իր իրավահաջորդ առաջարկելով ներկայիս արտգործնախարար Ալեքսանդր Շալենբերգին:
«Կառավարական այս ճգնաժամն ավարտված է», – ասել է նախագահը Կուրցի հրաժարականից հետո իր առաջին հայտարարության մեջ։
Նա շնորհակալություն է հայտնել Կուրցին պետական ինստիտուտների ամբողջականության պահպանման գործում ունեցած մեծ ավանդի համար։
Առայժմ հայտնի չէ, թե ով կփոխարինի Շալենբերգին Ավստրիայի ԱԳ նախարարի պաշտոնում:
Չորեքշաբթի Ավստրիայի տնտեսական և կոռուպցիոն հանցագործությունների հետաքննության դատախազությունը հաստատել է, որ հետաքննություն է վարում Կուրցի և նրա ինը մերձավորների նկատմամբ կոռուպցիայի և կաշառակերության գործով:
Ընդդիմության կողմից հնչել են կանցլերի հրաժարականի կոչեր, իսկ կոալիցիայի գծով Կուրցի կուսակցության գործընկերը ՝ «Կանաչներ» կուսակցությունը, հայտարարել է իր պարտականությունները կատարելու կանցլերի անկարողության մասին՝ պահանջելով առաջարկել այդ դերի համար արժանի նոր թեկնածու:
