Քաղաքականություն
06.10.2021 | 20:412020 թ. Ղարաբաղյան 44-օրյա պատերազմն ընդգծեց Հայաստանի դիրքի և քաղաքականության մի շարք թույլ կողմերը: Ռազմական գործոններ, որոնք նպաստել են պարտությանը. որո՞նք պետք է լինեն Հայաստանի արտաքին քաղաքականության առաջնահերթությունները, ի՞նչը պետք է լինի Հայաստանի արտաքին քաղաքականության հիմնական նպատակը, ո՞վ է մշակում և ո՞վ է իրականացնում Հայաստանի արտաքին քաղաքականությունը:
Պատմաբան, նախկին դիվանագետ Ժիրայր Լիպարիտյանը, ֆրանսահայ քաղաքագետ Թալին Փափազյանը, ֆրանսահայ բիզնես ղեկավար և վերլուծաբան Ռոբերտ Այդաբիրյանը ութ ամսվա հետազոտություններից և լայնածավալ խորհրդակցություններից հետո հրապարակել են զեկույց՝ որպես Սպիտակ Թուղթ, որը մանրամասնորեն և խորությամբ ուսումնասիրում է այն խզվածքները, որոնք հանգեցրին պատերազմի և պարտության՝ այդ պատերազմում։ Զեկույցը նաև սահմանում է այն միջավայրը, որի ներսում Հայաստանն այժմ գործում է տարածաշրջանային և միջազգային առումներով:
Հետազոտությունը ներառում է աշխարհի շուրջ 45 հայ փորձագետների և վերլուծաբանների տեսակետների համառոտագիրը՝ պատերազմի պատճառների, վարման ու հետևանքների վերաբերյալ:
Փաստաթուղթը ներկայացնում է նաև առաջարկություններ ապագայի կապակցությամբ ընտրությունների և բարեփոխումների վերաբերյալ:
«Այս Սպիտակ Թուղթը հրավեր է ազնվաբար, լրջորեն և խորապես վերլուծելու վերջին պատերազմը և պարտության տանող մտայնությունը, հրաժարվելու իրականությունը անտեսելու, իրականությունը մեր ցանկությունների հետ փոխարինելու մտայնությունից, որպեսզի կարողանանք խուսափել նույն սխալներից։
Լրջության այդ մակարդակին հասնելու համար նախ և առաջ անհրաժեշտ է անցնել երկու կարևոր հանգրվաններով. առաջին՝ ճշտել, թե ով և որ մտայնությունն է պատասխանատվություն կրում պատահածի համար, երկրորդ՝ ընդունել այդ պարտության ամբողջ տարողությունը: Նոր ինքնավստահությունը և ապագային դրականորեն նայելը պետք չէ որ լինի այդ պարտության տարողության ու հետևանքների անտեսման գնով, այլապես դատապարտված ենք կորցնելու այն, ինչ մնացել է»,- «2020թ. Ղարաբաղյան պատերազմը և Հայաստանի ապագա արտաքին ու անվտանգության քաղաքականությունները» թեմայով առցանց քննարկման ժամանակ ընդգծեց պատմաբան, նախկին դիվանագետ Ժիրայր Լիպարիտյանը:
Մանրամասները՝ տեսանյութում:
