Քաղաքականություն
05.10.2021 | 23:02
Հարավային Կովկաս Թուրքիայի ներխուժումը՝ անցյալ տարի Լեռնային Ղարաբաղի պատերազմում Ադրբեջանին ցուցաբերած ռազմական աջակցությամբ, թվում է՝ տալիս է իր արդյունքը, քանի որ այն խաթարում է տարածաշրջանում Ռուսաստանի հեգեմոնիան։ Նման կարծիք է հայտնել վերլուծաբան Էմիլ Ավդալիանին, փոխանցում է «Ահվալ» գործակալությունը։
Ըստ նրա՝ թուրքական կառավարությունն այժմ առանցքային դեր ունի Հարավային Կովկասում։
«Ամեն դեպքում՝ հիմա իրադարձությունները շատ լավ են զարգանում Էրդողանի և նրա՝ տարածաշրջանային առաջնորդ դառնալու երազանքների համար»,- ասել է վերլուծաբանը։
Նա նշել է, որ Արցախյան 44-օրյա պատերազմում Անկարայի աջակցությունը Բաքվին վճռական նշանակություն է ունեցել։
Ըստ Ավդալիանիի՝ պատերազմից հետո Հայաստանը փորձում է պրագմատիկ լինել արտաքին կապերում ու վերադասավորել հարաբերությունները Թուրքիայի հետ։ Անկարան էլ, վերլուծաբանի կարծիքով, իրեն «դիրքավորել է որպես ծանրության նոր կենտրոն Հայաստանի, Ադրբեջանի ու Վրաստանի համար», տրանսպորտային և տնտեսական դիվերսիֆիկացիան ևս կնշանակի տարածաշրջանում ռուսական ազդեցության նվազում։
«Թուրքիայի համար սահմանի վերաբացումը ևս օգտավետ է՝ Ադրբեջանի հետ ավելի արագ կապ հաստատելու համար։ Իսկ տարածաշրջանային կապերի բարելավումը հիմնաքարն է Հարավային Կովկասում ավելի ուժեղ դիրքի հասնելու՝ Թուրքիայի ձգտման համար։ Իր ռազմական ու տնտեսական ներկայությամբ Թուրքիան կարող է հուսալ, որ կբացի նոր երկաթուղիներ ու ճանապարհներ՝ այդպիսով կայուն կերպով նվազեցնելով ռուսական, որոշ չափով՝ նաև աշխարհաքաղաքական ազդեցությունը Հարավային Կովկասում»,- նշել է վերլուծաբանը։
Էմմա Չոբանյան
