Ալիևը Ջրականում զորամաս է բացել և լուսանկարվել իսրայելական անօդաչուների հետ․ ԼՈՒՍԱՆԿԱՐՆԵՐ

Ադրբեջանի նախագահ Իլհամ Ալիևը նախօրեին այցելել է Արցախի գրավյալ Ջրական։ Տեղական լրատվամիջոցների փոխանցմամբ՝ Ալիևը ռուսական «Կամազ» և «Գանձակի ավտոմոբիլային գործարանի» արտադրական միավորման համատեղ սպասարկման կենտրոնի, «Արաքսի հովիտ տնտեսական գոտի» արդյունաբերական պարկի, ինչպես նաև հիվանդանոցի, դպրոցի և առաջին բնակելի թաղամասի հիմքն է դրել։

Ուշագրավ է, որ Ալիևը Ջրականում մասնակցել է Ադրբեջանի պետական սահմանապահ ծառայության զորամասի բացմանը, որտեղ նրան ուղեկցել է Ադրբեջանի սահմանապահ ծառայության ղեկավար Էլչին Գուլիևը։

Զորամասից հրապարակված լուսանկարներում երևում են տարատեսակ անօդաչու թռչող սարքեր։ Ըստ տեղեկությունների՝ զորամասի սպառազինության շարքում են հարվածային Harop և Quzğun անօդաչու թռչող սարքերը, հակատանկային նռնականետեր, ղեկավարվող հրթիռներ, 120 մմ և 80 մմ տրամաչափի ականանետեր։ Բացի այդ, առկա են զենիթային համակարգեր, տեսահսկողության ու գիշերային տեսահսկողության սարքեր, ջերմային սարքեր, հատուկ նշանակության տեխնիկա, ինչպես նաև զրահապատ փոխադրիչներ, զրահապատ մարտական մեքենաներ։
Ադրբեջանի նախագահը լուսանկարվել է իսրայելական արտադրության Harop kamikaze անօդաչու թռչող սարքի հետ։

Հատկանշական է, որ իսրայելական անօդաչուներն Ալիևը ցուցադրում է Իրանի հետ սահմանից մի քանի կիլոմետր հեռավորության վրա, և այս ամենը՝ իրանական պաշտոնական հայտարարությունների ֆոնին, որ Թեհրանը չի հանդուրժի Ադրբեջանում «սիոնիստական ռեժիմի ներկայությունն ու տարածաշրջանում սահմանային փոփոխությունները»։

Էմմա Չոբանյան