Քոչարյանը պատրա՞ստ է ՀՀ անկախության հաշվին քննարկել ՌԴ-ի հետ միութենական պետություն ստեղծելու հարցը․ ՏԵՍԱՆՅՈՒԹ

Փողոցային պայքարի ճանապարհով իշխանությունը վերցնելու հավակնություն ներկայացնող Ռոբերտ Քոչարյանի համար Ռուսաստանի հետ միութենական պետություն ստեղծելու հարցը քննարկման ենթակա գաղափար է: Այսօր հրավիրված ասուլիսի ժամանակ Քոչարյանը, պատասխանելով Factor TV-ի հարցին, ըստ էության, չբացառեց Հայաստանի անկախության հաշվին արտաքին համագործակցության որևէ ձևաչափի հնարավորությունը:

Ռոբերտ Քոչարյանը թեև ուղղակիորեն չնշեց, որ Հայաստանը պետք է Ռուսաստանի հետ միութենական պետություն ստեղծի, սակայն ակնարկեց, որ նման համագործակցությունն անհրաժեշտություն է:

Նշենք, որ հետխորհրդային պետություններից Ռուսաստանն ու Բելառուսը շուրջ մեկ ամիս առաջ համաձայնեցրին ինտեգրման, այսպես կոչված, բոլոր 28 ճանապարհային քարտեզները: Ենթադրվում է, որ այս համագործակցության հանգուցալուծումը պետք է լինի միութենական պետության ստեղծումը, թեև պաշտոնական Մոսկվան և Մինսկը բարձր մակարդակով դեռ համաձայնություն չեն հայտնել:

Ժուռնալիստների «Ասպարեզ» ակումբի խորհրդի նախագահ Լևոն Բարսեղյանը Ռուսաստանի հետ միութենական պետություն ստեղծելու հեռանկարը Հայաստանի համար ոչ բարենպաստ է համարում: Նա հիշեցնում է, որ Քոչարյանի իշխանության հենց առաջին տարիներից Հայաստանի անկախության հիմքերը թուլացել են: 2002 թվականին շուրջ 100 մլն դոլար պարտքի դիմաց Հայաստանը Ռուսաստանին հանձնեց 5 խոշոր ընկերություններ՝ «Մարս» գործարանը, «Հրազդանի» ՋԷԿ-ը և նախկին խորհրդային ռազմաարդյունաբերական համալիրի մեջ մտած 3 գիտահետազոտական ինստիտուտները՝ այսպիսով էականորեն մեծացնելով տնտեսական կախվածությունը Ռուսաստանից:

Դեմոկրատական կուսակցության նախագահ Արամ Սարգսյանը նշում է՝ միութենական պետություն ստեղծելու գաղափարը շրջանառվում է, քանի որ Հայաստանում 44-օրյա պատերազմից հետո ստեղծված իրավիճակով պայմանավորված՝ քաղաքացիներն իրենց անվտանգ չեն զգում:

Արամ Սարգսյանը կարծում է, որ Հայաստանը, միութենական պետության մաս դառնալու փոխարեն, պետք է տարածաշրջանում Թուրքիայի գործոնը ինչ-որ չափով չեզոքացնող պետությունների մասնակցությամբ կոալիցիա ստեղծի, որտեղ, սակայն, գերիշխողը կրկին ՌԴ-ն է:

Նշենք, որ Մոսկվայի կողմից Երևանին միութենական պետություն ստեղծելու ակնարկներ չեն արվել: Սակայն իշխանությունները, Արցախի և ՀՀ-ի անվտանգային և այլ առանցքային հարցերի խնդիրների մասին խոսելիս, մշտապես կարևորում են Ռուսաստանի դերը:

Մանրամասները՝ տեսանյութում։

Նարեկ Կիրակոսյան