15.11.2024 | 18:28
Ինչ արտոնություններ են նախատեսվում տրանսպորտից օգտվելիս․ ավագանու նիստում կքննարկվի առաջարկը
Թերացումների համար ազատվեց աշխատանքից և նշանակվեց առավել բարձր պաշտոնի. ՏԵՍԱՆՅՈՒԹ
Տեսանյութեր
22.03.2018 | 20:20
Գեներալ-լեյտենանտ Հայկազ Բաղմանյանը նախագահ Սերժ Սարգսյանի՝ մարտի 22-ի հրամանագրով նշնակվել է Հավաքական անվտանգության պայմանագրի կազմակերպության՝ ՀԱՊԿ միացյալ շտաբի պետի տեղակալ՝ 3 տարի ժամկետով: Այս նշանակման մասին թեև վերջին օրերին լուրեր էին տարածվում, սակայն, այնուամենայնիվ, Բաղմանյանի՝ նման պաշտոնում նշանակումը տարակուսելի է՝ հաշվի առնելով նախորդ պաշտոնից ազատվելու պատճառը:
Ընդամենը երեքուկես ամիս առաջ՝ 2017թ. դեկտեմբերի 5-ին, նախագահ Սարգսյանը Հայկազ Բաղմանյանին ազատեց ՀՀ ԶՈւ գլխավոր շտաբի պետի տեղակալի պաշտոնից: Դրանում մեծ դեր էր ունեցել պաշտպանության նախարար Վիգեն Սարգսյանը, ով նույն օրը հայտարարել էր, թե Բաղմանյանը զորացրման զեկուցագիր է գրել իր հորդորով՝ որպես պատճառ նշելով աշխատանքային պայմանավորվածությունները չկատարելը։
Բանակի ամենաազդեցիկ պաշտոնյաներից մեկի՝ ծառայությունից արձակումը հավանության արժանացավ հասարակական-քաղաքական շրջանակներում. ոմանք սա համարեցին մեծ համարձակություն Վիգեն Սարգսյանի կողմից: Եվ հիմա՝ դժվար է պատկերացնել, թե ինչպե՞ս է պաշտպանության նախարար Վիգեն Սարգսյանը շարունակելու աշխատել իր նախկին ենթակայի հետ՝ արդեն հավասարի դիրքերից, եթե մինչ այդ նրա հետ համատեղ աշխատանքը չէր պատկերացնում՝ թերացումների պատճառով։
Սա, ի դեպ, ոչ խրախուսելի ազդակ է պաշտոնյաներին․ ստացվում է, որ մեզանում թերացումների համար պաշտոնյային նշանակում են առավել լավ պաշտոնի:
Ի դեպ, Հայկազ Բաղմանյանն այս տարիներին, համաձայն մամուլի, դարձել է բանակի ամենահարուստ ներկայացուցիչներից մեկը: Նրա անունը կապվում է մի շարք բիզնեսների հետ: Իսկ Մարտունի քաղաքի պանրագործարանի տնօրեն Թաթուլ Բաղդասարյանն էլ Բաղմանյանին մեղադրում էր իր բիզնեսը՝ գործարանի տարածքում կառուցված գազալցակայանը, խլելու մեջ: Իրավական հետևանքներ, սակայն, չեղան:
Սևակ Հակոբյան
