14.10.2026 | 20:44
Իրանամետ հաքերները ստանձնել են Ադրբեջանի դեմ կիբերհարձակման պատասխանատվությունը՝ պատճառ նշելով հիջաբ կրելու արգելքը
Ջրամբարների ներկայիս պաշարները կարող են որոշակի ռիսկեր առաջացնել. վարչապետի հանձնարարականը
Տնտեսություն
22.03.2018 | 11:36
ՀՀ Կառավարության այսօրվա նիստում վարչապետ Կարեն Կարապետյանի առաջին հանձնարարականը վերաբերում էր ոռոգման շրջանի նախապատրաստական աշխատանքներին: Վարչապետը տեղեկացրեց, որ Կառավարությունում կազմակերպված խորհրդակցության ընթացքում Ջրային տնտեսության պետական կոմիտեն ներկայացրել է ջրամբարների լցվածության տվյալները և 2018 թվականի ոռոգման շրջանի նախապատրաստական աշխատանքները։
Կարապետյանի փոխանցմամբ՝ քննարկվել են նաև ըստ մարզերի ոռոգման պայմանները և առաջնահերթությունները։ «Հաշվի առնելով, որ ջրամբարների ներկայիս պաշարները կարող են որոշակի ռիսկեր առաջացնել ոռոգման, ջրամատակարարման տեսանկյունից, հանձնարարում եմ Ջրային տնտեսության պետական կոմիտեի նախագահին՝ 7-օրյա ժամկետում՝ շահագրգիռ մարմինների հետ համատեղ մշակել և ներկայացնել Ֆինանսների նախարարություն՝ շարժական պոմպային սարքավորումների, խորքային պոմպերի ձեռքբերման, չշահագործվող խորքային հորերի վերականգման, ինչպես նաև նորերի հորատման նախագծային աշխատանքների ֆինանսական հաշվարկները՝ հաշվի առնելով գյուղացիական տնտեսությունների ոռոգման ջրի պահանջարկի ապահովումը»,- ասաց Կառավարության ղեկավարը:
Բացի այդ, Կարապետյանը ֆինանսների, տարածքային կառավարման և զարգացման, բնապահպանության նախարարներին ևս հանձնարարեց նախատեսված փաթեթը ստանալուց հետո 10-օրյա ժամկետում Ջրային տնտեսության պետական կոմիտեի հետ համատեղ նախաձեռնել համապատասխան գնումների և աշխատանքների մեկնարկման գործընթացը ևդրանք ավարտին հասցնել մինչև ապրիլի 16-ը, միաժամանակ ապահովելով օրենքով սահմանված շրջակա միջավայրի ազդեցության գնահատման փորձաքննության կատարումը՝ հնարավորինս սեղմ ժամկետներում։
Վարչապետը հանձնարարեց նաև գուղատնտեսության, տարածքային կառավարման և զարգացման նախարարներին, Ջրային տնտեսության պետական կոմիտեի նախագահին և մարզպետներին՝ 3-ամսյա ժամկետում ամփոփել ջրային ոլորտում առկա ներդրումային ծրագրերը, որոշել 2019 թվականի առաջնահերթությունները և համապատասխան առաջարկություններ ներկայացնել Կառավարության աշխատակազմ։ Ինչպես նաև, ոռոգման սեզոնի նախապատրաստական աշխատանքների պլանավորումն այսուհետ սկսել աշուն-ձմեռ ժամանակահատվածում:
