Անվտանգության ծառայություններում խախտումներ են հայտնաբերվել. ոստիկանությունը մրցակցում է մասնավորի հետ

Փետրվարին հարկային մարմինները ստուգումներ են անցկացրել պահնորդական ծառայություններ մատուցող ընկերություններում: ՊԵԿ մեր աղբյուրը հայտնում է, որ ստուգումները հրահանգավորված են «վերևից» և դրանց միջոցով կառավարությունը փորձում է ավելի վերահսկելի դարձնել անվտանգության ծառայությունների շուկան, որտեղ մեծ գումարներ են շրջանառվում:

Factor.am-ը հարցում էր ուղարկել պետեկամուտների կոմիտե, փորձելով պարզել, թե որ ընկերություններում են ստուգումներ իրականացվել և արդյունքում ինչ խախտումներ են հայտնաբերվել: Ի պատասխան ՊԵԿ-ը ներկայացրեց 2017-2018 թթ. ընթացքում պահանորդական ծառայություններ մատուցող տնտեսվարող սուբյեկտների մոտ իրականացված ստուգումների վերաբերյալ տվյալներ: Դրանց համաձայն, նշված ժամանակահատվածում ստուգումներ են իրականացվել «Ար- Մոբիլ», «Սիլեր» և «Ֆիլյոր» ընկերություններում: Ամենամեծ խախտումը հայտնաբերվել է «Ար-Մոբիլ»-ում: Այս ընկերությունը շահութահարկի գծով 4 մլն 299 հազար դրամ քիչ է մուտքագրել պետբյուջե: Մյուս 2 տնտեսվարողների մոտ փետրվարի 20-ին իրականացված ստուգումների արդյունքում չգրանցված աշխատողներ են բացահայտել: «Սիլերում»՝ մեկ չգրանցված են գտել, իսկ «Ֆիլյոր» ընկերությունում՝ երկու հոգի:

Խախտման արդյունքում արձանագրված գումարը կազմել է 120 հազար դրամ: ՊԵԿ մեր աղբյուրը վստահեցնում է, որ ստուգումներն իրականում ավելի շատ ընկերությունների են ընդգրկել, պարզապես մի մասի հետ համաձայնություն է ձեռք բերվել: Դրանց ղեկավարները և տանիքը հիմնականում այլ պետական կառույցների նախկին և ներկա աշխատակիցներ են: Պահնորդական ընկերությունների հետ են կապվում ՊՆ նախկին պաշտոնյա, գեներալ մայոր Վարդան Ավետիսյանի, ԱԱԾ գեներալ-մայոր Զավեն Նանյանի, պետգույքի կառավարման վարչության պետ Արման Սահակյանի անունները:

Պահնորդական ծառայությունների շուկայում ոստիկանությունը, որը պայմանագրային հիմունքներով անվտանգության ծառայություններ է մատուցում բանկերին, խանութներին, այլ հաստատությունների, փոփոխական հաջողությամբ մրցակցում է մասնավոր ընկերությունների հետ: Անվտանգության աշխատողների շրջանում կարծիք կա, որ ՀՀ ոստիկանության պետական պահպանության գլխավոր վարչությունը ավելի արդյունավետ է իրականացնում տարբեր հաստատությունների հսկողությունը, քան մասնավոր ընկերությունները: Մանավանդ, որ ոստիկանության պահնորդները օբյեկտները հսկելիս, ի տարբերություն այլոց, մարտական զենք են կրում:

Կարծիքներ կան նաև, որ հարկային «հարձակումները» նպատակ ունեն վերաբաշխում կատարել այս շուկայում՝ ոստիկանության օգտին: Հայաստանում մոտ 4 տասնյակ պահնորդական և թիկնապահական ընկերություններ են գրանցված, որոնցից մի քանիսը՝ «Բերկուտ», «Պանտերա», «Սպեցնազ», «Լեգիոն», «Գրիֆ», «Արմոբիլ», առավել լայն ճանաչում ունեն: Պետք է ընդունել, որ այս շուկայում մենաշնորհներ առայժմ չկան:

Սյուզան Սիմոնյան