ԱՄՆ-ն կարող է պատժամիջոցներ կիրառել Մարգարիտա Սիմոնյանի, Ռոման Աբրամովիչի, Ալեքսեյ Միլլերի և ՌԴ նախագահին մերձավոր այլ մարդկանց նկատմամբ

ԱՄՆ Ներկայացուցիչների պալատի կանոնակարգման հանձնաժողովը հավանություն է տվել օրինագծին, որով առաջարկվում է պատժամիջոցներ կիրառել 35 անձի նկատմամբ, որոնց ռուսաստանցի ընդդիմադիր գործիչ Ալեքսեյ Նավալնին և նրա կողմնակիցները մեղադրում են մարդու իրավունքների խախտման ու կոռուպցիայի մեջ։ Այս մասին թվիթերյան գրառմամբ հայտնել է Հելսինկյան հանձնաժողովի անդամ, կոնգրեսական Պոլ Մասսարոն, գրում է DW-ի ռուսական ծառայությունը։

Այսպես կոչված «Նավալնիի ցուցակում» ներառված են գործարարներ Ռոման Աբրամովիչը, Ալիշեր Ուսմանովն ու Օլեգ Դերիպասկան, «Ռոսնեֆտ»-ի ղեկավար Իգոր Սեչինը, «Գազպրոմ»-ի նախագահ Ալեքսեյ Միլլերը, «Առաջին ալիքի» գլխավոր տնօրեն Կոնստանտին Էռնստը, RT-ի գլխավոր խմբագիր Մարգարիտա Սիմոնյանը, Քննչական կոմիտեի նախագահ Ալեքսանդր Բաստրիկինը, Անվտանգության դաշնային ծառայության տնօրեն Ալեքսանդր Բորտնիկովը, Ռոսգվարդիայի տնօրեն Վիկտոր Զոլոտովն ու այլ բարձրաստիճան պաշտոնյաներ, գործարարներ և ՌԴ նախագահ Վլադիմիր Պուտինի մերձավոր շրջապատից այլ անձինք։

Պատժամիջոցների սահմանման օրինագիծը ներկայացվել է դեմոկրատ կոնգրեսական Թոմ Մալինովսկու և հանրապետական Ջոն Քերթիսի կողմից՝ «Մագնիտսկու ակտին» համապատասխան։

Եթե օրինագիծն ընդունվի Կոնգրեսի կողմից, ապա «Նավալնիի ցուցակը» պետք է գնահատի ԱՄՆ նախագահ Ջո Բայդենը։ Դրա համար Սպիտակ տանը տրվում է 6 ամսից ոչ ավելի ժամանակ։ Պատժամիջոցների կիրառումը մնում է վարչակազմի հայեցողությանը։

Էմմա Չոբանյան