Ֆրանսիայի հետ խզելով սուզանավերի վերաբերյալ պայմանագիրը՝ Ավստրալիան կասկածի տակ է դրել ոչ միայն Փարիզի, այլեւ ամբողջ Եվրոպայի վստահությունը, հայտարարել է Ֆրանսիայի ԱԳՆ-ին կից պետքարտուղար Կլեման Բոնը:
Նախօրեին ԱԳ նախարար Ժան Իվ Լե Դրիանը հայտնել էր, որ ԱՄՆ-ում և Ավստրալիայում դեսպաններին հետ են կանչել խորհրդակցությունների համար։ Դրանից հետո ԱՄՆ-ում նշել են, որ վարչակազմը սերտ կապ է պահպանում ֆրանսիական իշխանությունների հետ և մտադիր է առաջիկա օրերը նվիրել տարաձայնությունների կարգավորմանը:
«Ես չգիտեմ, թե ինչպես մենք այժմ կարող ենք վստահել մեր ավստրալացի գործընկերներին։ Եվ դա քայլ չէր Ֆրանսիայի դեմ, Դա Եվրոպայի նկատմամբ վստահության կորուստ է»,- «ՌԻԱ Նովոստի»-ի փոխանցմամբ՝ ասել է Բոնը France 24-ի եթերում։
Կանբերայի հետ կապված միջադեպից հետո Եվրոպան պետք է ուժեղացնի իր ռազմավարական ինքնավարությունը և պաշտպանությունը, նշել է նա:
Նրա խոսքով ՝ այժմ եվրոպական երկրները պետք է գործողությունների անցնեն։
Այս շաբաթ Մեծ Բրիտանիայի վարչապետ Բորիս Ջոնսոնը, ԱՄՆ-ի նախագահ Ջո Բայդենը և Ավստրալիայի վարչապետ Սքոթ Մորիսոնը հայտարարել են պաշտպանության և անվտանգության ոլորտում AUKUS-ի նոր գործընկերության ստեղծման մասին: Կանբերան նաև հայտնել է ֆրանսիական Naval Group ընկերության հետ սուզանավերի պայմանագրից դուրս գալու մասին:
56 մլրդ եվրո-ի համաձայնագիրը, որը կոչվում էր «դարի պայմանագիր», նախատեսում էր Barracuda դասի 12 հարվածային սուզանավերի արտադրություն: Լե Դրիանը Ավստրալիայի որոշումը «թիկունքից հարված» է անվանել։
Փարիզը պարզաբանումներ է ակնկալում ինչպես Ավստրալիայի, այնպես էլ ԱՄՆ-ի կողմից։
