Քաղաքականություն
07.09.2021 | 17:41«Ամենամեծ մոլորությունն այն է, որ անընդհատ քաղաքական իշխանությանն են հարցնում դատական վճիռների արագության, որակի մասին: Այդ մասին լրագրողները կարող են հարցնել դատավորներին, քննչական մարմիններին»,- Factor.am-ի հետ զրույցում նշեց «Քաղաքացիական պայմանագիր» խմբակցության պատգամավոր Վահագն Հովակիմյանը:
«Մենք խոստումներ ենք տվել, որ Հայաստանում իրականացվելու է արդարադատություն. Հայաստանն իրավական պետություն է: Մենք մեր հասանելիքն անելու ենք՝ եթե պետք է Հակակոռուպցիոն կոմիտե ստեղծել, ստեղծելու ենք, պետք է Հակակոռուպցիոն դատարան ստեղծել, ստեղծելու ենք, այսինքն, այն, ինչը որ քաղաքական իշխանության անելիքն է, արվելու է, իսկ դատական գործերի ընթացքի և որակի մասին լավ կլինի հարցեր ուղղեք ոչ թե պատգամավորներին ու քաղաքական գործիչներին, այլ դատական համակարգի ներկայացուցիչներին և հետաքրքրվեք, թե որ գործն ինչու ձախողվեց կամ ինչու են թույլ ապացույցներով գործեր բերում»,- ասաց Հովակիմյանը:
«Ես, որպես լրագրող, նախկինում պատգամավորներին Մարտի 1-ի գործի ընթացքի վերաբերյալ հարցեր չէի տալիս, այլ իրենց դիրքորոշումն էի հարցնում, օրինակ՝ այն մասին, որ մի ոստիկանի ցուցմունքով քաղաքացի էր ազատազրկվում»,- նշեց պատգամավորը:
Հովակիմյանը նաև կարծիք հայտնեց, որ Մարտի 1-ի գործը բացահայտված է. «Այդ 80 էջը կարող եք վերցնել, կարդալ: Ես այնքան եմ հետաքննել Մարտի մեկի գործը, կարող եմ ասել, որ կրակելու հրաման կատարելը մի բան է, Մարտի 1-ի գործը մի այլ բան: Կրակելու հրամանը կատարողներն այնքան մեղավոր չեն, ինչքան այդ հրամանը տվողները»,- նշեց պատգամավորը:
Մանրամասները՝ տեսանյութում:
