Քաղաքականություն
27.08.2021 | 23:37
Հայուհի Գայանե Գևորգյանն այցելել է Վանի Տուշպա շրջանի հայկական գերեզմանոց, որը բուլդոզերով ավերվել է, և իր ձեռքերով թաղել գերեզմաններից դուրս եկած ոսկորները։
Նշենք, որ Վանի Քելեջիկ թաղամասի հայկական գերեզմանոցն ավերվել է վերջերս։ Ըստ հրապարակումների՝ տարածքի սեփականատերը բուլդոզերներ է բերել և քանդել գերեզմանները։ Գերեզմանաքարերն ոչնչացել են, ոսկորները՝ դուրս եկել հողից։
GazeteFersude-ն գրում է, որ Գայանե Գևորգյանը, որի ընտանիքը 1915 թվականի Հայոց ցեղասպանության ժամանակ Գևաշ շրջանից Հայաստան է գաղթել, հիմա ապրում է Վանում, որտեղ ժամանակին ապրել է իր ընտանիքը։
Կինը նշել է, որ 6 տարի է, ինչ ապրում է Վանում, սակայն նման դեպք չի եղել։ Նա հավելել է, որ Հայոց ցեղասպանության ժամանակ գաղթած հայերի գերեզմանները հիմա քանդում են։
«Շատ հայեր դեռ փնտրում են իրենց պապերի գերեզմանները: Մի կին, որը երեկ ինձ զանգահարել էր Նիդերլանդներից, ասաց այն գյուղի անունը, որտեղ ապրել է իր պապը: Ես ուսումնասիրեցի, այն Էրջիշում է։ Այդ կնոջ հայրը խնդրել է դստերը՝ գտնել պապի գերեզմանը: Նրանք, ովքեր մի օր գալու են այստեղ, կասեն՝ «այստեղ մեր պապերի գերեզմաններն են» ու կբախվեն այս տեսարանին»,- ասել է Գայանե Գևորգյանը՝ նշելով, որ մահացածներին գոնե պետք է հարգանքով վերաբերվել։
Գայանե Գևորգյանը նշել է, որ հայկական գերեզմանների հետ նույնկերպ են վարվում նաև Ադրբեջանում։ Կինը խնդրել է Վանի բնակիչներին՝ այլևս չփորել գերեզմաններն ու եկեղեցիները։
Նշենք, որ հայկական գերեզմանոցի ավերման հարցը խորհրդարանում բարձրացրել էր Ժողովուրդների դեմոկրատական կուսակցության Վանից պատգամավոր Մուրատ Սարըսաչը։
Էմմա Չոբանյան
