Ադրբեջանը մեդալներով է պարգևատրել Արցախյան պատերազմին մասնակցած մի խումբ թուրք օդաչուների և զինծառայողների

Թուրքիայի Ամասիա նահանգի Մերզիֆոն քաղաքի 5-րդ կործանիչ ավիացիայի բազայի մի խումբ օդաչուներ և զինծառայողներ պարգևատրվել են Ադրբեջանի Հանրապետության մեդալներով, ըստ երևույթին՝ Արցախյան 44-օրյա պատերազմում մասնակցության համար։

Ադրբեջանական իշխանությունների խոսափող haqqin.az-ը գրում է, որ պարգևատրման արարողության ժամանակ Ամասիայի նահանգապետ Մուսթաֆա Մասատլին նշել է, որ Թուրքիան «մեկ ազգ՝ երկու պետություն» կարգախոսով շարժվելով՝ աջակցություն է ցուցաբերել «Ղարաբաղի հողերը օկուպացիայից ազատագրելուն»։

Նա նաև ասել է, որ թուրքական ռազմաօդային ուժերը ինչպես երկրի ներսում, այնպես էլ դրանից դուրս ահաբեկչության դեմ պայքարում ցուցադրելով իրենց առավելությունը՝ վստահություն են ներշնչում իրենց ընկերներին, իսկ թշնամիներին՝ վախ։

Նշվում է, որ միջոցառումից հետո թուրքական օդուժի 11 հոգանոց անձնակազմին, որից 3-ը օդաչուներ են, հանձնվել են պարգևները։ Այս ամենը մեկ անգամ ևս ապացուցում է հայկական կողմի՝ դեռ ռազմական գործողությունների ընթացքում արված պնդումները պատերազմում Թուրքիայի անմիջական մասնակցության մասին։ Ի դեպ, ադրբեջանական լրատվամիջոցը նաև գրում է, որ Թուրքիան ռազմաօդային ուժերի մի քանի F-16 կործանիչներ 44-օրյա պատերազմի ընթացքում գտնվել են Ադրբեջանում՝ արտաքին ագրեսիայից խուսափելու համար։

Հավելենք, որ ադրբեջանական լրատվամիջոցներն առաջին անգամ են բացահայտ ներկայացնում այս տեղեկությունը։ Դեռևս պատերազմի ընթացքում պաշտոնական Բաքուն պարբերաբար հերքում էր թուրքական F-16-երի մասնակցությունը ռազմական գործողություններին և, ընդհանրապես, դրանց առկայությունը Ադրբեջանում։

Հայկական կողմի պնդումների ու տարբեր լրատվամիջոցներում Գանձակի օդանավակայանի՝ F-16-ով արբանյակային լուսանկարների հրապարակումից հետո Ադրբեջանի նախագահ Իլհամ Ալիևը CNN-ին տված հարցազրույցում թեև խոստովանել էր դրանց առկայությունը, սակայն հերքել մարտական գործողություններում ներգրավման փաստը։

Էմմա Չոբանյան