Թալիբներն արգելել են աֆղան կանանց դուրս գալ տնից

Աֆղանստանում իշխանությունը զավթած «Թալիբան» շարժման զինյալներն արգելել են կանանց տնից դուրս գալ աշխատանքի, քանի դեռ «նրանց անվտանգության ապահովման համակարգը չի հաստատվել»։ Այս մասին, DW-ի հաղորդմամբ, հայտարարել է «Թալիբանի» ներկայացուցիչ Զաբիհուլլահ Մուջահիդը։

Մուջահիդը հրամանը ժամանակավոր միջոց է անվանել ՝ բացատրելով, որ թալիբների անվտանգության ուժերը դեռ «չեն սովորել, թե ինչպես վարվել կանանց հետ, ինչպես խոսել նրանց հետ»:

«Մինչև ամբողջական անվտանգության ապահովումը, մենք խնդրում ենք կանանց մնալ տանը», – ասել է նա:

«Թալիբանի» ներկայացուցիչները, Աֆղանստանի տարածքում լիակատար վերահսկողություն հաստատելուց գրեթե անմիջապես հետո, ասացին, որ թույլ կտան կանանց վարել ակտիվ ապրելակերպ, բայց շարիաթի օրենքներին համապատասխան: Օրինակ՝ կանանց այլևս թույլ չեն տալիս փողոց դուրս գալ առանց տղամարդ ազգականի և առանց ամբողջ մարմինը ծածկող հագուստի: Բացի այդ, կանայք դուրս են մնում որոշակի տեսակի աշխատանքներից, այդ թվում`ԶԼՄ-ներում:

Օգոստոսի 18-ին հայտնի դարձավ կանանց նկատմամբ հաշվեհարդարի երկու դեպքի մասին. թալիբները սպանել են չորս երեխաների մորը ՝ իրենց համար ուտելիք պատրաստելուց հրաժարվելու համար, ինչպես նաև գնդակահարել մի կնոջ ՝ առանց փարանջայի փողոց դուրս գալու համար։

Այս ամենից մեկ օր առաջ Քաբուլում մի խումբ կանայք բողոքի ակցիա էին կազմակերպել ՝ պահանջելով կանանց տեղեր հատկացնել Աֆղանստանի ապագա կառավարությունում:

Տաթև Ֆռանգյան