Քաղաքականություն
25.08.2021 | 18:54«Մեր այսօրվա քննարկման լարվածությունը գալիս է նրանից, որ մենք տեղի ունեցած աղետի վերաբերյալ չունենք տրված գնահատական։ Որպեսզի պարզենք ճշմարտությունը, պետք է քաղաքական, սոցիալ-տնտեսական և իրավական հստակ գնահատականներ տրվեն»,- այս մասին այսօր ԱԺ ամբիոնից հայտարարեց «Հայաստան» խմբակցության քարտուղար Արծվիկ Մինասյանը:
Պատգամավորը հիշեցրեց Արայիկ Հարությունյանի և Ռուսլան Իսրայելյանի միջև տեղի ունեցած հեռախոսազրույցի ձայնագրությունը, որի մասին երեկ խորհրդարանում հիշատակել էր իր կուսակից Արամ Վարդևանյանը։ Միանսյանը դիմելով վաչապետ Նիկոլ Փաշինյանին՝ նշեց. «Արայիկ Հարությունյանը՝ Արցախի Հանրապետության նախագահը, մեղադրում է Ձեզ մի արարքի մեջ, որը պետական դավաճանության հատկանիշ է։ Դա մենք չենք ասում, դա ասում է Արցախի Հանրապետության նախագահը»։
Այնուհետև Արծվիկ Մինասյանը Փաշինյանին առաջարկեց. «Վկայակոչեք այն իրավական նորմը, որով դուք Գերագյուն, գլխավոր հրամանատար եք, և այն իրավասությունները, որով մտել եք բանակցությունների մեջ և ստորագրել նոյեմբերի 9-ի համաձայնությունը, ու կորցրել ենք Արցախի 75 տոկոսը»:
Անդրադառնալով կառավարության ծրագրին՝ Մինասյանը նշեց. «Քանի դեռ չեն գնահատվել այն կորուստները, որ ունեցել ենք, այն տնտեսական, սոցիալական բեռը, որ մեր ուսերին է, ինչպե՞ս եք խոսում սոցիալ-տնտեսական այս ծրագրի, 7 տոկոս տնտեսական աճի մասին… Այսքան կորուստներից հետո շարունակում եք պնդել, որ 7 տոկոս տնտեսական աճ ենք ունենալու: Ներդրումային ի՞նչ քաղաքականության մասին եք խոսում… Ներդրումներ են պետք: Եթե նկատի չունեք թուրք-ադրբեջանական կապիտալը, ապա կառավարության ծրագիրը չի կարող իրականանալ, եթե նկատի ունեք թուրք-ադրբեջանական կապիտալը, դա նշանակում է Հայաստանի վերջնական կործանում: Հույս ունեմ, այնուամենայնիվ, որ այս վերջինը նկատի չեք ունեցել»:
Մանրամասները՝ տեսանյութում:
