16.09.2026 | 23:17
Գեղարքունիքի մարզի մի շարք հասցեներում 24 ժամ ջուր չի լինի
ՀՀ ՊՆ-ն առաջարկում է անցկացնել նոր վարժական հավաքներ՝ ներգրավելով 2․169 քաղաքացու
Հասարակություն
11.08.2021 | 19:19
ՀՀ պաշտպանության նախարարությունն առաջարկում է եռամսյա վարժական հավաքներ իրականացնել՝ ներգրավելով ընդհանուր մինչև 2 169 քաղաքացու, որոնցից 1 164-ը՝ շարքային, 254-ը` ենթասպայական, 751-ը` սպայական կազմի պահեստազորայիններ՝ մոտոհրաձգային, հրթիռահրետանային, կապի, հետախուզական և ինժեներական մասնագիտություններով: Նախագիծն օգոստոսի 10-ին հանրային քննարկման է դրվել e-draft.am կայքում։
Ըստ նախագծի՝ վարժական հավաքներն իրականացնելու համար կառաջանա լրացուցիչ ծախսերի կատարման անհրաժեշտություն՝ 3 027 611 000 ՀՀ դրամի չափով: Դրանք կատարվելու են ՀՀ պաշտպանության նախարարությանը հատկացված, ինչպես նաև՝ կառավարության պահուստային ֆոնդի միջոցների հաշվին:
Որոշման նախագծի համաձայն՝ վարժանքներն իրականացվելու են 2021 թվականի օգոստոսի 25-ից նոյեմբերի 25-ը՝ ռազմատրանսպորտային պարտականություններ ունեցող մարմիններից ներգրավելով տրանսպորտային միջոցներ։
Նախագծի ընդունման անհրաժեշտությունը բացատրվում է հետևյալ կերպ․
«Վարժական հավաքները հայտարարվում են պահեստազորայինների ռազմական ունակությունների կատարելագործման և վերապատրաստման, նրանց հետ կնքված պայմանագրի համաձայն՝ ըստ անհրաժեշտության մարտական հերթապահության ներգրավման նպատակով»։
Նախագծի մեջ նշվում է, որ այս գործընթացը կրելու է շարունակական բնույթ և հետագա տարիներին մարտական հերթապահության կընդգրկվեն նոր ստորաբաժանումներ և նոր պահեստազորայիններ:
Արփի Հակոբյան
