Իրաքն իր քաղաքացիներին դուրս է բերում Բելառուսից

Վերջին երկու օրվա ընթացքում ավելի քան 300 իրաքցի Մինսկից Բաղդադ է մեկնել Իրաքի իշխանությունների կազմակերպած չվերթներով: Օդանավերը Քաբուլից Մինսկ են հասել դատարկ և տարել են օգոստոսի 9-ին 80, իսկ օգոստոսի 10-ին՝ Իրաքի 240 քաղաքացի, ովքեր ավելի վաղ ժամանել էին Բելառուս՝ ԵՄ երկրներ գնալու մտադրությամբ, սակայն փորձը ձախողվել է, գրում է DW-ի ռուսական ծառայությունը:

Իրաք է տեղափոխվել նաև Բելառուսից Լիտվայի սահմանը հատել փորձելու ժամանակ մահացած տղամարդու մարմինը: Բելառուսից անօրինական փախստականների հոսքի և սահմանին տիրող ճգնաժամային իրավիճակի պատճառով Լատվիան օգոստոսի 11-ից արտակարգ իրավիճակ է մտցրել սահմանամերձ շրջաններում: Ավելի վաղ նման քայլի էր դիմել Լիտվան:

Ինչպես միգրանտները պատմել են լրագրողներին, բելառուս սահմանապահները չեն խոչընդոտել նրանց սահմանը հատելուն, այնուամենայնիվ, լիտվական կողմից սահմանապահները նրանց դիմավորել են շներով, օդ են կրակել և ստիպել են հետ դառնալ:

Բելառուսից Լիտվայի սահմանը 2021 թվականի սկզբից հատել է ավելի քան 4 հազար անօրինական ներգաղթյալ: Նրանք հիմնականում փախստականներ են Իրաքից, Աֆղանստանից, Սիրիայից եւ աֆրիկյան երկրներից: Նրանցից շատերը վերջին երկու ամսում են հայտնվել Լիտվայի տարածքում: Անօրինական միգրանտների հետ կապված իրավիճակն այնքան է լրջացել, որ հուլիսի սկզբին Լիտվայի իշխանությունները հայտարարեցին ծայրահեղ իրավիճակի ռեժիմի սահմանման, ինչպես նաև Բելառուսի հետ սահմանին ցանկապատ տեղադրելու մտադրության մասին:

Տաթև Ֆռանգյան