29.06.2026 | 20:58
ՀՀ-ում էժան գներով բենզին չկա, որովհետև աշխարհում գնաճ կա. Գևորգ Պապոյան․ ՏԵՍԱՆՅՈւԹ
Արցախում սկսվել է խորքային հորերի հորատումը. 900 հա կդառնա ոռոգելի
12.03.2018 | 18:05
«Հայաստան» համահայկական հիմնադրամի խորքային հորերի հորատման ծրագրով Արցախում արդեն սկսված են չորս հորի փորման աշխատանքները:
«Արցախպրես»-ի թղթակցի հաղորդմամբ՝ այդ մասին ասել է ԱՀ գյուղատնտեսության նախարար Ժիրայր Միրզոյանը՝ նշելով, որ, ընդհանուր առմամբ, Հիմնադրամի միջոցներով նախատեսվում է 37 խորքային հորերի հորատում:
Արդյունքում նախատեսվում է լրացուցիչ շուրջ 900 հա տարածք դարձնել ոռոգելի. դրանից, նախնական տվյալներով, օգտվելու է 850 ընտանիք:
«Ընտրել ենք այնպիսի տարածքներ, որոնք սակավաջուր են, եւ մակերեւույթային ջրերը հասանելի չեն: Ընդհանուր առմամբ՝ մեր մակերեւույթային ջրերով տեսականորեն հնարավոր է ոռոգել 16 հազար հա գյուղատնտեսական նշանակության տարածք՝ հիմնականում վարելահողեր եւ այգիներ: Սակայն 16 հազար հա-ը խիստ հարաբերական է: Այն պայմանավորված է տվյալ տարվա մեջ հանրապետությունում տեղումների քանակով եւ գետերում ու ջրամբարներում ջրի պաշարով: Հետեւաբար, մակերեւութային ջրերը հեռահար ծրագրերի եւ, մանավանդ, ջրամբարներից հեռու տարածքների համար փոքր-ինչ ռիսկային են: Խորքային հորերի մասով պաշարներն ավելի կայուն են եւ ծրագրերի համար ավելի կանխատեսելի», – մանրամասնել է Ժ. Միրզոյանը:
Նախարարը տեղեկացրել է նաեւ, որ 37 խորքային հորերը հիմնականում նախատեսած են Մարտունու շրջանում, որտեղ մակերեւույթային ջրեր գրեթե չկան կամ չափազանց քիչ են, Ասկերանի շրջանի այն հատվածներում, որտեղ հասանելի չեն շրջանի տարածքով հոսող հիմանական գետերի՝ Կարկառի եւ Խաչենի ջրերը, ինչպես նաեւ մեկը՝ Հադրութի շրջանում:
«Փորձել ենք հանրապետությունում այս կերպ պահպանել գյուղատնտեսության մեջ աշխուժության համաչափությունը: Ունենալով խորքային հորեր՝ մենք ակնկալում ենք բերքատվության մոտ 2 անգամ բարձրացում: Նշված հողատարածքներում ջրի պաշարների բավարարման դեպքում՝ կշարունակենք ընդլայնել ոռոգովի տարածքները»,- ընդգծել է գյուղնախարարը:
