Քաղաքականություն
06.08.2021 | 12:33«Պատիվ ունեմ» խմբակցությունն առաջարկում է ԱԺ-ում ստեղծել Արցախի հարցերով մշտական հանձնաժողով: Առաջարկին միացել է նաև «Հայաստան» դաշինքը:
«Պատիվ ունեմ» խմբակցության քարտուղար Հայկ Մամիջանյանը, ներկայացնելով նախագիծը, նշեց. «Հայաստանի Հանրապետության կողմից Արցախին տրամադրվող աջակցություն, ԼՂ կարգավորման բանակցային գործընթաց, Արցախի հետ ռազմական, քաղաքական, դիվանագիտական, ֆինանսական տնտեսական կապեր, տարածաշրջանային անվտանգություն, Արցախի ԱԺ-ի հետ համագործակցություն. Արցախի հարցերով մշտական հանձնաժողովը ստեղծվելու է այս և այլ ոլորտները կարգավորող օրենքները համակարգելու և աշխատանքների կազմակերպման համար»:
Նրա խոսքով՝ հանձնաժողովի տիրույթում է գտնվելու նաև ՀՀ և Ադրբեջանի, ինչպես նաև Արցախի հանրապետության և Ադրբեջանի միջև սահմանազատումների իրականացման միջազգային նորմերի և պրակտիկայի կիրառման ուսումնասիրության խնդիրը:
«Թեպետ ինձ համար անընկալելի է «ՀՀ ԱԺ-ում Արցախի հարցերով մշտական հանձնաժողովի ստեղծման հակափաստարկ» արտահայտությունը, բայց ենթադրում եմ, որ որպես հակափաստարկ կբերվի, որ բոլոր մշտական հանձաժողովները պիտի զբաղվեն Արցախի խնդրով։ Այո՛, ոչ միայն բոլոր հանձնաժողովները, այլև ՀՀ յուրաքանչյուր քաղաքացի պիտի ուժերի ներածին չափով աշխատի Արցախի համար, հանուն մեր հայրենիքի… Եվ այն փաստարկը, թե կարող է առաջանալ ոլորտների վերադրում, կարծում եմ, չի դիմանում որևէ քննադատության։
Այս կամ այն հանձնաժողովի ստեղծումը շատ ուժեղ մեսիջ է ամբողջ աշխարհին։ Աշխարհը ունի կարիք լսելու ՀՀ-ից այն մեսիջը, որ մեր երկրի ԱԺ-ում ստեղծվում է Արցախի հարցերով մշտական հանձնաժողով»,- նշեց Մամիջանյանը։
Մանրամասները՝ տեսանյութում:
